१ फागुन , विराटनगर ।
सरकारी स्वामित्वको दूरसञ्चार कम्पनी नेपाल टेलिकमको नाफा घटेको छ । पुस मसान्तसम्म नेपाल दूरसञ्चार कम्पनीको नाफा ७.६० प्रतिशतले घटेको हो । गत आवको दोस्रो त्रैमासमा कम्पनीको नाफा ४ अर्ब २५ करोड ४७ लाख रुपैयाँ रहेकोमा अहिले ७.६० प्रतिशतले घटेर ३ अर्ब ९३ करोड १४ लाख रुपैयाँ रहेको छ ।
यो अवधिमा कम्पनीको कुल आय २१ अर्ब ३० करोड ९३ लाख ७९ हजार रुपैयाँ रहेको छ । गत आवको सोही अवधिमा २२ अर्ब १० करोड ११ लाख ३७ हजार रुपैयाँ रहेको थियो । यो अवधिमा कुल आय ३.५८ प्रतिशतले घटेको छ । यस्तै कम्पनीको कुल सञ्चालन आय १७ अर्ब २४ करोड ६७ लाख ७९ हजार रुपैयाँ रहेको छ ।
उक्त रकम गत आ.व. को सोही अवधिमा १८ अर्ब ७ करोड ७३ लाख ४८ हजार रुपैयाँ रहेको छ । यो अवधिमा कुल सञ्चालन आय ४.५९ प्रतिशतले घटेको छ । १८ अर्ब चुक्ता पुँजी रुपैयाँ रहेको टेलिकमको रिजर्भ कोषमा ७२ अर्ब ६७ करोड रुपैयाँ रहेको छ ।
कम्पनीको प्रतिसेयर आम्दानी ४३ रुपैयाँ ६८ पैसा रहेको छ भने प्रतिसेयर नेटवर्थ भने ५०३ रुपैयाँ ७६ पैसा रहेको छ । नाफादेखि सबै सूचक घट्नुमा ओटीटी सेवाको बढ्दो प्रयोग रहेको टेलिकमले बताएको छ । अन्तरआबद्धतामा गत आर्थिक वर्षको तुलनामा चालू वर्षको दोस्रो त्रैमाससम्ममा ५२ करोड ९२ लाख ७५ हजारले कमी आएको छ ।
यस्तै, आम्दानीदेखि सञ्चालन आय र नाफा घट्नुको अन्य कारणकारुपमा बिजुलीका असहज आपूर्ति, दुर्गम तथा विकट क्षेत्रमा कम प्रतिफलमा सेवा विस्तार लगायतका कारण समेत रहेको बताइएको छ । नेपाल टेलिकम नेपालको सरकारी स्वामित्वको ९१.४९% हिस्सा भएको सरकारी स्वामित्वको दूरसञ्चार सेवा प्रदायक हो ।
