२ फागुन, विराटनगर ।
कोशी प्रदेशका मुख्यमन्त्री केदार कार्की प्रदेश सरकारले केही समयअघि मात्रै १० वर्षमुनिका बालबालिकाहरुका लागि घोषणा गरिएको निःशुल्क उपचार लागू भए नभएको बारे अनुगमन गरेका छन् ।
कोशी प्रदेश सरकारले १० वर्षमुनिका बालबालिकालाई गतमाघ १५ गतेबाटै निःशुल्क उपचारको प्रबन्ध गरिसकेको छ ।
प्रदेश सरकारले उपचारका लागि पहिलो सम्पर्क अस्पताललाई प्रदेश मातहतका सबै अस्पतालका साथै, कोशी अस्पताल विराटनगर, विपी कोइराला स्वास्थ्य विज्ञान प्रतिष्ठान धरानका स्थानीयतहमातहतका सबै अस्पताललाई तोकेको छ ।
बालबालिकालाई निःशुल्क उपचार गराउन पहिलो सम्पर्क अस्पतालमा जानुपर्दछ, त्यहाँबाट प्रेषण गर्नू परेमा प्रदेश सरकारले तोकेका अस्पतालमा लैजान सकिन्छ ।
यही सेवाको अनुगमनका लागि कोशीका मुख्यमन्त्री केदार कार्की मङ्गलवार जिल्ला अस्पतालउदयपुर पुगेका थिए ।
उनी बच्चाका वार्डमा पुग्दा आफूले बाहिरबाटै औषधि ल्याउने गरेको र निःशुल्कउपचारका बारेमा आफूलाई जानकारी नभएको सेवाग्राहीहरुले उनी समक्ष गुनासो गरेका थिए ।
छड्के अनुगमनमा पुगेका मुख्यमन्त्री कार्कीले अस्पतालको सरसफाइ लगायत विभिन्न वार्डहरूको अनुगमनमा सन्तोषजनक अवस्था नदेखिएपछि अस्पताललाई तुरुन्त व्यवस्थित गरी सरकारले कार्यान्वयनमा ल्याएका योजनाहरू तुरुन्त लागू गर्न निर्देशन दिएका छन् ।
‘सरकारका योजना कार्यान्वयनमा नल्याउने अस्पतालहरूलाई हामी कारबाही गछौं, उनले भने, कोशी प्रदेशको कोहीपनि १० वर्ष भन्दा कमको बच्चा बिरामी भएमा उपचार सेवाबाट वञ्चित नहुन् ।’
जिल्ला अस्पताल उदयपुरका मेसु डा. ज्ञानेन्द्र झाले सरकारको योजना कार्यान्वयनकालागि आन्तरिक व्यवस्थापन गरिरहेको बताए ।
‘हामीआन्तरिक तयारीमा छौँ, व्यवस्थापन भइरहेकाले केहीदिनबाटै निःशुल्कउपचारको सेवा सुरु गछौं उनले मुख्यमन्त्रीलाई ब्रिफिङ गराउँदै भने ।’
मुख्यमन्त्री कार्कीले आउने सेवाग्राहीलाई सहज बनाउन अस्पतालका कर्मचारीहरूलाई निर्देशन दिएका छन् ।
उनले भने ‘सेवाग्राहीलाई हरेक कुरा थाहा नहुन सक्छ, तपाईँहरूले थाहा दिनुपर्दछ कोशी प्रदेशका हरेक नागरिकले तिरेको करको सदुपयोग हुनुपर्छ । प्रदेशका बालबालिकाले उपचार पाउनुपर्छ ।’
