८ फागुन , एजेन्सी ।
हजारौं प्रशिक्षार्थी चिकित्सकको राजीनामाले दक्षिण कोरियामा हलचल मच्चाएको छ । दक्षिण कोरियाली सरकारको योजनाको विरोधमा प्रशिक्षार्थी चिकित्सकहरूले राजीनामा दिएका छन्। जसका कारण देशमा चिकित्सा सेवा ठप्प भएको छ । तर, सरकारले प्रशिक्षार्थी चिकित्सकलाई काममा फर्कन निर्देशन दिएको छ ।
त्यस्तै, चिकित्सकको अभावलाई मध्यनजर गर्दै सरकारले ड्युटी समय बढाएको छ । दक्षिण कोरियाली सरकारले मेडिकल विद्यार्थीको संख्या बढाउने योजनाको अहिले विरोध भइरहेको छ। यस योजनाको विरोधमा हजारौं प्रशिक्षार्थी डाक्टरहरू उत्रिएका छन्।
समाचार एजेन्सी आईएएनएसका अनुसार ६ हजार ४०० भन्दा बढी प्रशिक्षार्थी चिकित्सकले सरकारलाई राजीनामा बुझाएका छन् । हजारौं प्रशिक्षार्थी चिकित्सकले राजीनामा दिएपछि चिकित्सा सेवा प्रभावित भएको अधिकारीहरुले बताएका छन् । चिकित्सक अभावका कारण शल्यक्रिया र उपचारमा ढिलाइ भइरहेको छ ।
स्वास्थ्य मन्त्री पार्क मिन–मिनले भने कि मन्त्रालयले ८३१ प्रशिक्षार्थी चिकित्सकहरूलाई काममा फर्कन आदेश दिएको योनहाप समाचार एजेन्सीले उल्लेख गरेको छ । पार्कले सोमबारसम्म १ सय अस्पतालका ६ हजार ४१५ प्रशिक्षार्थी चिकित्सकले राजीनामा बुझाएको र १ हजार ६ सयले राजीनामा दिएको बताएका छन् ।
पार्कले चिकित्सा सेवामा आउने कठिनाइलाई सम्बोधन गर्न सरकारले ९७ सरकारी अस्पतालमा ड्युटी समय बढाएको र १२ वटा सैनिक अस्पतालमा आकस्मिक कक्ष सर्वसाधारणका लागि खुला गर्ने बताएका छन् । स्वास्थ्य अधिकारीका अनुसार दक्षिण कोरियामा अन्य देशको तुलनामा डाक्टरको संख्या कम छ । तर, सरकारले यस विषयमा विचारविमर्श नगरेको र यस कदमले चिकित्सा शिक्षा र सेवाको गुणस्तरमा सम्झौता हुने चिकित्सकको दाबी छ ।
