११ फागुन, विराटनगर ।
मोरङको बुढिगंगा गाउँपालिका–४ नेमुवा चोक नजिकै भारतीय नम्बर प्लेटको लरी पल्टिँदा तीन बालबालिकाको ज्यान गएको छ । भारतबाट मार्बलको ब्लक लिएर आएको आरजे २९ जीबी १५६१ नम्बरको लरी सडक छेउमा रहेका घरमा पल्टिँदा किचिएर बालबालिकाहरूको मृत्यु भएको हो ।
शुक्रवार बिहान करिब ८ बजेतिर भएको दुर्घटनापछि दुर्घटना स्थलबाट घाइतेहरूको उद्धार गर्ने प्रयास गरे पनि मार्बलको ब्लकले किचिएर बालबालिकाहरूको मृत्यु भएको प्रहरीले जनाएको छ । बूढीगंगा–४ प्रगति टोलमा ५५ वर्षीय ज्योति अधिकारीका जुल्याहा छोराछोरीको सुतिरहेकै ठाउँमा किचिएर मृत्यु भएको छ ।
मृत्यु हुनेमा चार वर्षीया इसिता अधिकारी र निशान्त अधिकारी रहेको प्रहरीले जनाएको छ । त्यस्तै अधिकारीको घरमा रहेको पसलमा आएकी ७ वर्षीया रिया खवासको समेत लरीबाट खसेको मार्बलले किचेर मृत्यु भएको जनाइएको छ । दुर्घटनामा मार्बलको ब्लकले किचेर ज्योति अधिकारी समेत घाइते भएका छन् ।
उनको खुट्टा लरीले किचेको हो । प्रहरीले क्रेनको सहायताले मार्बलको ब्लक पन्छाएर उनलाई उद्धार गरी थप उपचारका लागि विराट टिचिङ अस्पताल पठाइएको मोरङ प्रहरीले जनाएको छ । कोयलपुरस्थित अन्नपूर्ण मार्बल उद्योगको कच्चा मार्बल ब्लक लिएर आएको भारतीय नम्बर प्लेटको लरी सडकमा फसेपछि बिजुलीको पोललाई ठक्कर दिँदै दुर्घटना भएको जनाइएको छ ।
दुर्घटनापछि लरी चालक फरार रहेकोले उनको खोजी भइरहेको प्रहरीले जनाएको छ । जिल्ला प्रहरी कार्यालय मोरङका प्रहरी प्रमुख एसपी नवराज कार्कीका अनुशार क्रेनको सहयोगमा प्रहरीको टोलीले ७ घण्टाको प्रयास पछि मात्रै बालबालिकालाई बाहिर निकालेको थियो ।
