२१ फागुन , काठमाण्डौ ।
अन्ततः वामलोकतान्त्रिक सत्ता गठबन्धन भत्किएको छ । भर्खरै सम्मपन्न नेपाली कांग्रेसको महासमिति बैठकमा माओवादी र समग्र गठबन्धन विरुद्धको आवाज बुलन्द भएपछि झस्किएको माओवादीले राष्ट्रिय सभा अध्यक्ष समेत गुमाउने स्थिती आएपछि पुन पुस १० कै वाम गठबन्धनमा फर्किने निर्णय गरेको छ । सत्तारुढ गठबन्धन भित्रको असमझदारीलाई बाहिरैबाट नियालीरहेको बलियो प्रतिपक्ष एमाले र रास्वपाले सरकार हाकिरहेको माओवादीलाई साथ दिएपछि सत्तारुढ गठबन्धन भत्किएको छ ।
फेरि एमाले र रास्वपाले बालकुमारी घटनामा दोषी देखिएका यातायातमन्त्री प्रकाश ज्वालाको राजीनामालाई प्रमुख एजेण बनाएपछि प्रधानमन्त्री प्रचण्ड झनै दबाबमा आइरहेको बेला कांग्रेस मन्त्री हेरफेर गर्न पूर्ण उदार नदेखिएपछि नयाँ गठबन्धनको पुर्नजन्म भएको छ। नेकपा माओवादी केन्द्रका नेता देवेन्द्र पौडेलले सरकारमा रहेका नेपाली कांग्रेसका मन्त्रीहरुले प्रधानमन्त्रीलाई सहयोग नगरेका कारण सत्ता गठबन्धन परिर्वतन गर्नुपरेको दाबी गरेका छन्।
उनले बालुवाटारको पदाधिकारी बैठकपछि पत्रकारसँग कुरा गर्दै उनले कम्युनिष्टहरु धुव्रीकरण गर्दै लैजानका लागि यो कदम चालेको बताए। उनले वामपन्थी धुव्रीकरण आवश्यकता देखिएकाले यो कदम चालिएको उल्लेख गरे । ‘प्रधानमन्त्रीलाई काम गर्न सहज गरिदिनुपर्छ। प्रधानमन्त्री अर्थ मन्त्रालय प्रमुख नै हुन्छ ,’ उनले भने , ‘सरकारमा रहनु भनेको काम गर्नु हो। प्रधानमन्त्रीले मंसिरदेखि सरकार पुनर्गठन चाहनुभएको थियो । जनताको काममा अघि बढाउन कांग्रेसका मन्त्रीहरुको सहयोग भएन।’
उनले प्रधानमन्त्रीलाई सरकार परिर्वतन गर्न नदिनु, अर्थमन्त्रीले काम नगर्नु र अरु मन्त्रीहरुले प्रधानमन्त्रीलाई सहयोग नगरेको उनले दाबी गरेका छन् । आइतबार रातिसम्म चलेको कांग्रेस र माओवादी केन्द्रको बैठकले सत्ता समीकरण बदल्ने निर्णय गरेको हो । अब गत वर्ष १० पुसमा बनेकै गठबन्धनलाई आधार मानेर नयाँ समीकरण बन्नेछ ।
त्यसका लागि राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा) र राष्ट्रिय प्रजातन्त्र पार्टी (राप्रपा) लाई पनि समेट्ने सहमति भएको छ । नयाँ सहमति अनुसार, आज बिहानै बसेको बैठकबाट रास्वपाले निर्णय लिने अधिकार सभापति रवि लामिछानेलाई दिएको छ । बालकोटमा बसेको एमाले सचिवालय बैठकले पनि नयाँ सत्ता समीकरण आजै अगाडि बढाउने निर्णय गरेको छ ।
बैठकले पदम गिरीलाई सरकारमा पठाउने निर्णय समेत गरेको छ । अब नेपाली कांग्रेससँगको गठबन्धन टुटेसँगै प्रदेशहरूमा मुख्यमन्त्री फेरिने भएका छन्। कोशीमा कांग्रेसका केदार कार्की, मधेसमा जसपाका सरोजकुमार यादव, बागमतीमा माओवादीका शालिकराम जम्कट्टेल, गण्डकीमा कांग्रेस सुरेन्द्रराज पाण्डे, कर्णालीमा माओवादीका राजकुमार शर्मा, लुम्बिनीमा कांग्रेसका डिल्लीबहादुर चौधरी, सुदूरपश्चिममा कांग्रेसका कमलबहादुर शाह मुख्यमन्त्री छन्।
प्रतिनिधि सभामा एमालेका ७९, माओवादी केन्द्रका ३२ , रास्वपाका २१ र जसपाका १२ जना सांसद छन्। सरकार बनाउन तीन दलको संख्या पर्याप्त छ। सरकार निर्माणका लागि १३८ जना सांसद आवश्यक पर्छ।
