Nepal Times
Nepal Times
531
Shares

नारी !

नारी !

२५ फागुन, विराटनगर ।

आज अन्तराष्ट्रिय नारी दिवस,  आज जसै गरी हरेक वर्ष नारी दिवस आउँछ र जान्छ पनि ! यही अवसरमा २—४ वटा नारी स्वतन्त्रता, नारी शिक्षा, नारीका हक हितका नारा लगाइन्छ, २ —४ वटी नारीलाई सम्मान पनि गरिन्छ । ठूलाठूला आश्वासनले भरिपूर्ण भाषणहरु दिइन्छ अनि वस सकियो नारी दिवस ?  यती मै सिमित छौ त हामी नारी ?

प्रथम महिला राष्ट्रपति भएको देशमा म अझै पनि घाम अस्ताएपछि घर फर्कन डराउनु पर्ने अवस्था छ । कारण, मेरा अविभावकले मलाइ स्वतन्त्रता दिएता पनि यो समाजले मेरा लागि मात्र नभइ समाजका सारा नारीका निम्ती केही सिमित मापदण्ड खडा गरेको छ । जुन सामाजिक प्राणी भएकै नाताले यो सव गलत हो भन्ने थाहा हुदाँहुदै पनि हामी ति भएभरका सारा अन्धविश्वास पालना गर्न विवश छौ ।

आखिर यो सब किन ? नारी भएकै नाताले हैन् त ? हो म नारी हुँ, मेरो यही लैंगिक पहिचानले मलाइ बारम्बार पिरोल्छ ! म नारी हुँ,म घाम अस्ताउनु अघि घर फर्कनु पर्छ,  म नारी हुँ, म चर्को स्वरमा बोल्नु हुन्न, म नारी हुँ, त्यसैले त मैले अन्याय,अत्याचार,हिंसा,शोषण जे भएनि सहनै पर्छ ?

जब आफना पिता समानका गुरु भनौदाले नै अभद्र व्यवहार गर्छन् ,सयौको अविभावकत्व बोकी सामाजिक संस्था चलाउने अग्रज भनौदाबाट नै एक नारी हिंसाको शिकार बन्छिन् । दिनभरी सभा सम्मेलनमा नारी हिसां अन्त्य हुनुपर्छ भन्ने ती तल्ला घरे काकाले साझपख माइली दिदीको भट्टीबाट घर फर्किना साथ बेकसुर रहेकी काकी माथि हातपात गरेको पनि यो समाजले देखेको छ ।

तर एक बेकसुर नारी माथि हातपात हुदासम्म यो समाज घरको मामिला हो भनेर आँखा र कान बन्द गरेर बसिदिने गर्दछ । कानूनले महिलाका निम्ती ३३% महिला हक को त व्यवस्था गर्यो तर मेरी बजैले एक्ली सन्तान भएतापनि छोरी भएकै कारण अंश पाइनन्, आखिर यो सव किन ? नारी भएकै नाताले हैन त ?

नारी दिवस भव्य रुपमा मनाइयोस् केही आपत्ति छैन ! तर भोलिको दिनमा कोही नारी अर्की निमर्ला बनी बलात्कृत हुनु नपरोस, कोही अर्की नारीमाथी मुस्कानलाई झै एसिड प्रहार नहोस्, भोलिको दिनमा कोही आमाले निर्मलाकी आमाझै न्यायको भिक माग्दै हिड्न नपरोस् । दिनहँु जसो सामाजिक संजालमा महिला हत्या , हिंसा , बलात्कारको,समाचार सुन्न नपरोस्।

यि सब त केबल झिना उदाहरण मात्रै हुन । पीडा र ती दानवबीय प्रबृत्ति भएकाहरु प्रतिको घृणा त मस्तिष्कमा छ । त्यसैले त भन्दैछु नदेखाउ ति नारी स्वतन्त्रता, नारी शिक्षा, नारीका हक हितका झुटा आश्वासन ।

यदि सक्छौ भने नारीलाई सम्मान मात्र हैन् सुरक्षाको अनुभुति दिलाउ, स्वतन्त्र र सुरक्षित भएर बाँच्न सक्ने वातावरण बनाउ । नारीलाई स्वतन्त्रतासँगै आत्मनिर्भर भइ जिउन सिकाउ, नारी भएकोमा हरेक नारीले गर्व सक्ने अवस्था सृजना गरौं । नारी सुन्दरी मात्र हैन सक्षम छन् भन्ने बताउ ।
= संचिता श्रेष्ठ

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.