Nepal Times
Nepal Times
477
Shares

पोप फ्रान्सिससंग रिसले आगो भयो युक्रेन

पोप फ्रान्सिससंग रिसले आगो भयो युक्रेन

२८ फागुन , एजेन्सी ।

इसाई धर्मालम्बीका सर्वाेच्च धार्मिक गुरु पोप फ्रान्सिसले युक्रेनलाई ‘सेतो झण्डा उचाल्ने हिम्मत जुटाउन’ सुझाव दिएपछि युक्रेन क्रुद्ध भएको छ । युक्रेनले कहिल्यै आत्मसमर्पण नगर्ने सो मुलुकका विदेशमन्त्रीले बताएका छन् । रुसले युक्रेनमा आक्रमण गरेको दुई वर्ष पूरा भइसकेको छ । यहीबेला ८७ वर्षीय पोपले स्विट्जरल्यान्डको एक च्यानलसँगको अन्तर्वार्तामा युक्रेनलाई रुससँग शान्तिवार्ता गर्न आह्वान गरेका थिए ।

शनिबार प्रसारित अन्तर्वार्तामा उनले आत्मसमर्पणको सम्भावना देखाएका छन् । ‘मलाई लाग्छ, ती मान्छे सबैभन्दा बलिया हुन्, जो परिस्थिति चिन्छन् । मानिसहरुबारे सोच्नुहोस् र सेतो झण्डा उठाएर वार्ता गर्ने हिम्मत जुटाउनुहोस्,’ उनले भनेका थिए । तर, युक्रेनी विदेशमन्त्री दिमित्री कुलेबाले पोपलाई असलको पक्ष रोज्न आग्रह गरेका छन् ।

‘हाम्रो झण्डा पहेँलो र नीलो छ । यही झण्डामुनि हामी बाँच्छौँ, मर्छौँ अनि जित्छौँ,’ कुलेबाले सामाजिक सञ्जालमा आइतबार लेखेका छन् । अन्तर्राष्ट्रिय रूपमा सेतो झण्डालाई युद्धविराम वा वार्ता वा आत्मसमर्पण गर्न इच्छुक भएको सङ्केत मानिन्छ । युक्रेनी राष्ट्रपति भोलोदोमिर जेलेन्स्कीले पनि पोपको भनाइलाई अस्वीकार गरेका छन् ।

भ्याटिकनका लागि युक्रेनका राजदूतले पोपको भनाइलाई दोस्रो विश्वयुद्धको समयमा हिटलरसँग वार्ताको वकालत गर्नेहरूसँग तुलना गरेका छन् । यसैबीच उता अमेरिकी टेक्नोलोजी कम्पनी माइक्रोसफ्टले आफ्नो प्रणालीमा रुसी ह्याकरले आक्रमण गर्ने प्रयास गरिरहेको आरोप लगाएको छ ।

माइक्रोसफ्टले जनाएअनुसार रूसी विदेशी खुफिया–सम्बन्धित ह्याकरहरूले जनवरीमा कर्पोरेट इमेलहरूबाट चोरी भएको डाटा प्रयोग गरेर माइक्रोसफ्टको प्रणालीमा प्रवेश गर्ने प्रयास गरिरहेको छ । यससँगै अमेरिकाको राष्ट्रिय सुरक्षाका लागि समेत आफ्नो उत्पादन प्रदान गर्ने माइक्रोसफ्टको सुरक्षालाई लिएर केही विज्ञहरुले चिन्ता समेत व्यक्त गरिरहेका हिन्दुस्तान टाइम्सले जनाएको छ ।

यसै वर्षको जनवरीमा माइक्रोसफ्टले सुरक्षा उल्लङ्घनको बारेमा विवरणहरू खुलासा गरेको थियो, जसमा ह्याकरहरूले कम्पनीका वरिष्ठ पदाधिकारी र साइबर सुरक्षा, कानुनी र अन्य कार्यहरूसहित कर्पोरेट इमेल खाताहरूमा प्रवेश गर्ने प्रयास रहेको थियो।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.