४ चैत, काठमाण्डौ।
दोस्रो पटक सरकारमा सहभागिता जनाएको राष्ट्रिय स्वतन्त्र पार्टी (रास्वपा)ले आफ्नो पार्टीबाट मन्त्री बनेकाहरुलाई सघाउन विज्ञ समूह बनाउने निर्णय गरेको छ । सो समूहमा सम्बन्धित विषयमा विज्ञता हासिल गरेका र अनुभव भएकाहरुलाई राख्ने रास्वपाले जनाएको छ ।
पार्टी र मन्त्रीहरुबीच समन्वय गर्ने उद्देश्यले गठन गरिएको समन्वय समितिको आइतबार बिहान बसेको बैठकले मन्त्रीहरुको काम प्रभावकारी बनाउन विज्ञ समूह बनाउने निर्णय गरेको रास्वपाका महामन्त्री तथा प्रवक्ता मुकुल ढकालले जानकारी दिए । प्रत्येक आइतबार रास्वापाका चार मन्त्री र उपसभापति स्वर्णिम वाग्ले, महामन्त्री डा.मुकुल ढकाल र सासंद शिशिर खनालको बैठक बस्ने गरेको छ ।
यस्तै राजनीतिक नियुक्तिमा परिवारवादलाई पूर्ण निषेध गरिएको ढकालले बताए । उनले यस्ता नियुक्ति जान्नेलाई छान्ने पार्टीको अवधारणा अनुसार समावेशितालाई मध्यनजर गरी मेरिटोक्रेसीलाई प्रधान मानि अघि बढाइने निर्णय गरिएको बताएका छन् । आज बसेको दोस्रो बैठकले मन्त्रालयहरूको एक हप्ताको काम, अनुभव र कमजोरीलाई समीक्षा गरिएको उनले बताए ।
मन्त्रालयका बजेट, नीति कार्यक्रम र तत्कालका लागि संशोधन गर्नुपर्ने नियम एवं साझा न्युनतम कार्यक्रमका बारेमा छलफल गरिएको पनि उनले बताए । यस्तै रास्वपाले सरूवा, बढुवा तथा नियुक्तिको सिफारिस गर्नेलाई साधारण सदस्यसमेत नरहने गरी कारबाही गर्ने निर्णय पनि गरेको छ ।
बैठकमा मन्त्रालयहरूको एक हप्ताको काम, अनुभव र कमजोरीबारे समीक्षा गर्नुका साथै मन्त्रालयका बजेट, नीति तथा कार्यक्रम र तत्कालका लागि संशोधन गर्नुपर्ने नियम एवं साझा न्युनतम कार्यक्रमबारे समेत छलफल भएको रास्वपाले जनाएको छ । रास्वपाका सभापति रवि लामिछाने उपप्रधान तथा गृहमन्त्री छन् ।
यस्तै उपसभापति डोलप्रसाद अर्याल (डिपी) श्रम, रोजगार तथा सामाजिक सुरक्षा मन्त्री छन् । संसदीय दलका उपनेता विराजभक्त श्रेष्ठ युवा तथा खेलकुद र सांसद सुमना श्रेष्ठ शिक्षा तथा विज्ञान प्रविधि मन्त्री छिन् । रास्वपाबाट रवि र अर्याल दोस्रो पटक सरकारमा गएका हुन् भने विराजभक्त र सुमना पहिलो पटक सरकारमा सहभागि भएका हुन् । रवि र अर्यालले यसअघि पनि अहिलेकै गृह र श्रम मन्त्रालयको जिम्मेवारी सम्हालेका थिए ।
