Nepal Times
Nepal Times
2.56k
Shares

रविको बचाउमा ओली, भने राजीनामा दिनु पर्दैन !

रविको बचाउमा ओली, भने राजीनामा दिनु पर्दैन !

६ चैत , काठमाण्डौ ।

उपप्रधान तथा गृहमन्त्री रवि लामिछानेविरुद्ध हिकारी पीडितहरुले उजुरी दिएको भन्दै उनको राजीनामा माग गरिरहेको अवस्थामा सत्तारुढ दल नेकपा एमालेका अध्यक्ष केपी शर्मा ओलीले उजुरी दर्ता भएकै आधारमा मन्त्री नहुने हो भने सबै पद खाली हुने बताएका छन् । मङ्गलबार धनगढीमा सञ्चारकर्मीले गृहमन्त्री रवि लामिछानेमाथि सहकारी ठगी प्रकरणमा उजुरी परेको र कांग्रेसले त्यही विषय संसदमा उठाएकोबारे सोधेको प्रश्नमा पूर्व प्रधानमन्त्री समेत रहेका ओलीले यस्तो बताएका हुन् ।

‘उजुरी हालेकै विषयमा मन्त्री नहुने हो भने त नेपालमा मन्त्री, सांसद सबै खाली हुन्छ । उजुरी त एउटा लगेर हाल्दिए भैगो नि !’, ओलीको भनाइ छ। उनले गम्भीर नै मुद्दा हुँदा, अपचलन देखिँदा, हिनामिना भएको ठहर भएमा त्यसलाई फरक ढङ्गबाट हेरिनुपर्ने बताए ।

‘नेपाली कांग्रेसको तर्फबाट मन्त्री भएको सन्दर्भमा अस्ति कुरा उठेको थियो कि मुद्दा एकपछि अर्को छ, मुद्दा गम्भीर छन् तर झण्डा हालेर बयान दिइरहनुभएको छ, यस्तो अवस्थामा कमसेकम मन्त्रीको पद लिएर छानबिन,अनुशन्धान र न्यायमा प्रभावित गर्न नखोजेर किनारामा बस्नुस’, अध्यक्ष ओलीले कांग्रेसका नेतामाथि प्रश्न उठ्न नसुनिएको बताउँदै भने ।

तर उनले एमाले नेतामाथि प्रश्न उठ्दा र बोलीमात्र चिप्लिदा पनि मन्त्रीबाट राजीनामा गर्न लगाएको स्मरण गरे । ‘बोली चिप्लियो भनेको भरमा हामीले शेरबहादुर तामाङ र गोकुल बाँस्कोटालाई राजीनामा गराएका थियौ’, ओलीको भनाइ छ । उनले गृहमन्त्री लामिछानेले पदबाट राजीनामा दिनु नपर्ने पनि बताए ।

उनले भने, ‘उनी सहकारी डुबाउने कुरामा लागेका छन् ? पैसा उठाउने सञ्चालक हुन् ? केही पनि छैन भने कसरी छानबिन प्रभावित हुन्छ ? कांग्रेसतिर रवि लामिछाने र उनको पार्टी लागेन त्यसो भएको हुँदा बदनाम गर्न खोज्ने फसाउने काम गरिएको हो ।’ उनले कांग्रेस सत्ताबाट बाहिर निस्किएपछि छाती पिटीपिटी रोएको टिप्पणी समेत गरेका छन् ।

यस्तै ओलीले नयाँ सत्ता गठबन्धनबाट पूरै कार्यकाल माओवादी अध्यक्ष पुष्पकमल दाहाल ‘प्रचण्ड’ प्रधानमन्त्री हुन सक्ने संकेत गरेका छन् । उनले आफूलाई प्रधानमन्त्रीको इच्छा नभएको र अरू प्रधानमन्त्री बन्न अगाडि नसरेको बताएका छन् ।

यद्यपि नेकपा एसका सचेतक मेटमणि चौधरीले भने प्रमुख तीन नेता प्रचण्ड, ओली र माधव नेपालबीच १५, १५ महिना प्रधानमन्त्री बन्ने सहमति भएको दाबी गरेका थिए । तर स्वयम माधव नेपालले समेत आफू प्रधानमन्त्री भन्दा कम्युनिष्ट एकतातर्फ केन्द्रित भएको बताउँदै आएका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.