Nepal Times
Nepal Times
3.54k
Shares

रविमाथि कांग्रेसको छायाँ पनि पर्न नदिनेमा प्रचण्ड–ओली

रविमाथि कांग्रेसको छायाँ पनि पर्न नदिनेमा प्रचण्ड–ओली

६ चैत , काठमाण्डौ ।

पछिल्लो पटक नयाँ मन्त्रीपरिषद् विस्तार भएसंगै उपप्रधान एवं गृहमन्त्री रवि लामिछानेको राजीनामा मागिरहेको प्रमुख प्रतिपक्षी नेपाली कांग्रेसले अब सहकारी अनियमिततामा लामिछानेको संलग्नताबारे छानबिन गर्न संसदीय समिति गठनको माग गरेको छ । छानबिन गर्न सरकार तयार नभए संसद चल्न नसक्ने उसले चेतावनी दिएको छ । प्रतिनिधिसभाको आज बसेको बैठकमा प्रधानमन्त्री पुष्पकमल दाहाल प्रचण्डले गृहमन्त्री लामिछानेमाथि नेपाली कांग्रेसले उठाएका प्रश्नको जवाफ दिएका थिए ।

उनले गृहमन्त्रीको बचाउ गरेका थिए । उनी कुनै सहकारीको सञ्चालक र व्यवस्थापन नभएको र उनको नाममा प्रवाह भएको ऋण फर्स्योट भएको देखिन आएकाले अनुसन्धान गर्नुपर्ने नदेखिएको भन्ने प्रहरीबाट ब्रिफिङ आएको प्रधानमन्त्रीको दाबी थियो । उनले यसलाई लिएर कांग्रेस राजनीतिकरण गर्न नहुने पनि बताएका थिए । तर प्रधानमन्त्रीको जवाफमा कांग्रेस सन्तुष्ट भएन । प्रश्नोत्तर सकिएलगत्तै कांग्रेस सांसदहरुले उठेर विरोध गरे ।

सभामुखले समय दिएपछि बोलेका कांग्रेस प्रमुख सचेतक रमेश लेखकले प्रधानमन्त्रीको सबै दाबीमा प्रश्न उठाए । ‘प्रधानमन्त्रीको जवाफले चित्त त बुझेन, बरु चिन्ता जाग्यो । चिन्ता के भने सम्माननीय प्रधानमन्त्रीलाई गलत जानकारी दिइँदैछ’, लेखकले भने, ‘प्रधानमन्त्री नै अँध्यारोमा हुनुहुन्छ भने निष्पक्ष छानबिन कसरी होला होला ?’ पीडितले दिएको जाहेरी, पोखरा महानगरपालिकाको अध्ययन प्रतिवेदन र स्वयं लामिछानेले सरकारी अड्डामा गरेको कागजात बाहिर आइसक्दा प्रधानमन्त्रीले प्रमाण छैन भनेको उल्लेख गर्दै लेखकले प्रश्न गरे, ‘के प्रमाण हुँदा अनुसन्धान हुन्छ ?’ प्रधानमन्त्रीले प्रमाण नै छैन भनेको र आफूहरुले पर्याप्त प्रमाण देखेको भन्दै उनले यसको छिनोफानोका लागि संसदीय छानबिन समिति गठनको प्रस्ताव गरेका छन् ।

विगतमा पनि प्रश्न उठ्दा मन्त्रीहरुले राजीनामा दिएको र संसदले छानबिन गरेको उदाहरण दिँदै कांग्रेस प्रमुख सचेतक लेखकले भने, ‘सदनभित्र छानबिन समिति गठन गरौं । प्रमाण छ कि छैन हेरौं ।’ यसअघि अर्को सत्तारुढ दल नेकपा एमालेका अध्यक्ष केपी शर्मा ओलीले पनि रविको बचाउ गरेका थिए । उनले पनि गृहमन्त्रीलाई लिएर काँग्रेसले अनावस्यक राजनीतिकरण गरेको आरोप लगाएका थिए । ओलीले सहकारी प्रकरणमा लामिछाने निर्दाेश रहेको दाबी गरेका थिए ।

मंगलबार धनगढीमा संचारकर्मीसँग कुरा गर्दै पुर्वप्रधानमन्त्रीसमेत रहेका अध्यक्ष ओलीले नेपाली कांग्रेसले रविको पार्टी आफूसँग नमिलेकोमा आक्रोश पोखिरहेको आरोप लगाएका थिए । साथै, ओलीले रवि निर्दोष भएका कारण गृहमन्त्री पदबाट राजीनामा दिनुपर्ने सम्मको अवस्था नभएको बताएका छन् ।

‘उनी (रवि) सहकारी डुबाउने कुरामा लागेका छन? पैसा उठाउने सञ्चालन हुन? केही पनि छैन भने कसरी छानबिन प्रभावित हुन्छ?’ ओलीले भने,’ ‘नेपाली कांग्रेसतिर रवि लामिछाने र उनको पार्टी लागेन त्यसो भएको हुँदा रविलाई बदनाम गर्न खोज्ने फसाउने काम गरिएको हो ।’

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.