मोदीको घर घेर्दै आप, धारा १४४ लागू

१३ चैत , एजेन्सी ।

दिल्लीका मुख्यमन्त्री अरविन्द केजरीवाल पक्राउको विरोधमा आज आम आदमी पार्टी (आप) ले भारतीय प्रधानमन्त्री नरेन्द्र मोदीको सरकारी निवास घेराउ गर्ने घोषणा गरेको छ । मदिरासम्बन्धी नीति प्रकरणमा मुख्यमन्त्री केजरीवाल हाल प्रवर्तन निर्देशनालय (ईडी) को हिरासतमा छन् । त्यसको विरोधमा आम आदमी पार्टीका नेता÷कार्यकर्ताले आज नयाँ दिल्लीको लोककल्याण मार्गस्थित प्रधानमन्त्री निवास घेराउ गर्ने भएका हुन् ।

तर दिल्ली प्रहरीले विरोध प्रदर्शनका लागि अनुमति नदिएको समाचार एजेन्सी एएनआईले जनाएको छ । समाचार एजेन्सी पीटीआईका अनुसार प्रधानमन्त्री निवास वरिपरि सीआरपीसी को धारा १४४ लगाइएको छ । पटेल चोक मेट्रो स्टेसननजिकै सुरक्षा व्यवस्था कडा पारिएको छ । दिल्ली यातायात प्रहरीका अधिकारीले भने अनुसार नयाँ दिल्ली र सेंट्रल दिल्लीका कयौं क्षेत्रहरुमा यो क्रममा यातायात प्रभावित हुनसक्छ ।

आम आदमी पार्टीले आइतबार पनि विरोध प्रदर्शन गरेका थियो । दिल्लीका मन्त्री गोपाल रायले भनेका थिए कि जसरी केजरीवाललाई पक्राउ गरिएको छ, त्यसले मानिसहरुमा क्रोध भरिएको छ । यता बीजेपीको पनि योजना केजरीवालको राजीनामा मागेर विरोध प्रदर्शन गर्नु रहेको छ ।

बीजेपीले अरुण जेटली क्रिकेट स्टेडियमदेखि दिल्ली सचिवालयसम्म मार्चपास गर्दैछ । यता आपले भने केजरीवाल दिल्लीका सीएम कायमै रहने र जेलभित्रैबाट काम गर्ने दाबी गरिरहेको छ । केजरीवालले इडी हिरासतबाटै आफ्नो सरकारलाई निर्देशन पनि दिन थालिसकेका छन् । भारतमा आगामी महिना सुरु हुने गरी निर्वाचनको मिति घोषणा भइसकेको छ ।

भारतमा मतदानका लागि एक अर्ब मानिस योग्य छन् । त्यहाँको निर्वाचनलाई विश्वकै सबैभन्दा ठूलो प्रजातान्त्रिक अभ्यास मानिन्छ । तर मोदी १० वर्ष सत्तामा बसिसके । उनी भारतको राजनीतिमा हावी छन् । सरकारी वेबसाइट, रेडिओ, टेलिभिजन, बिलबोर्ड र रेल्वे स्टेशनमा राखिएका स्क्रीनमा समेत मोदी नै छन् । यहाँ अरू नेताका लागि खासै ठाउँ छैन । मोदी अहिले ७३ वर्षका भए ।

उनी सत्तारूढ भारतीय जनता पार्टी (भाजपा) का प्रभावशाली नेता हुन् । भाजपाको चुनावी प्रचारका लागि उनी मुख्य निधि हुन् । उनी यूट्यूब, फेसबुक, इन्स्टाग्राम र एक्समा विश्वमै सबैभन्दा धेरै मानिसले फलो गर्ने नेता पनि हुन् । सामाजिक सञ्जालमा उनको बलियो उपस्थिति छ । एक अर्ब ४० करोड जनसङ्ख्या भएको देशमा उनको यो विशेषता प्रतिस्पर्धाहरूका लागि ईर्ष्याको विषय बनेको देखिन्छ ।

भारतमा संसदीय शासन व्यवस्था छ । तर मोदीको चुनावी अभियानको भिन्न शैलीले अमेरिकी राष्ट्रपतीय निर्वाचन अभियानको झल्को दिन्छ । उनको हिन्दू राष्ट्रवादी चुनावी प्रचारले भारतमा ध्रुवीकरण निम्त्याएको भए पनि भारतीय जनता पार्टी सन् २०१४ र २०१९ का सजिलै विजयी बन्यो । आगामी निर्वाचन पनि मोदीकै दलले जित्ने पूर्वआकलन गरिएको छ ।