१९ चैत , काठमाण्डौ।
नागरिक उन्मुक्ति पार्टीको केन्द्रीय कार्यालयमा नेताहरूबीच कुटपिट भएको छ । काठमाडौंको अनामनगरस्थित पार्टी कार्यालयमा सोमबार केन्द्रीय कमिटी बैठकअघि हात हालाहाल भएको हो । नाउपाको अध्यक्षमा रेशम चौधरीलाई निर्वाचन आयोगले मान्यता नदिएपछि पार्टीमा रञ्जिता श्रेष्ठकै अध्यक्षतामा रहेको २१ जना केन्द्रीय सदस्यहरूको संस्थापक केन्द्रीय समिति नै आधिकारिक छ ।
तर रेशम पक्षका नेताहरुले सबैलाई समेटेर लानुपर्ने भन्दै विवाद गरेपछि हात हालाहालको अवस्था आएको नेता रामलाल डगौरा थारूले बताए । टीकापुर नगरपालिकाका मेयर समेत रहेका केन्द्रीय सदस्य थारुले रेशम चौधरीको उपस्थितिमा आफूमाथि आक्रमण गरिएको बताए ।
“मिटिङका लागि टीकापुरबाट यहाँ आएका छौँ । पार्टीका अध्यक्ष रञ्जिता श्रेष्ठ चौधरीले बोलाएपछि हामी जम्मा हुँदै थियौँ । पाँचजना संस्थापन सदस्य त्यहाँ उपस्थित भयौँ । रेशमलाल दाइकै उपस्थितिमा आक्रमण भयो,” उनले भने, “कसले आक्रमण गरेको हो भन्ने रेशम दाइलाई थाहा होला ।” उनका अनुसार रेशम चौधरी पक्षका नेताहरुलाई समेटेर लैजान खोज्दा रञ्जिता पक्षका नेताहरुले नमानेका कारण विवाद भएको हो ।
रामलालले भने, ‘यसरी त पार्टी कसरी चल्छ ?’ नागरिक उन्मुक्तिमा केन्द्र र सुदूरपश्चिम प्रदेश सरकारमा सहभागिताका विषयमा विवाद छ । यस्तै, निर्वाचन आयोगले रेशम चौधरीलाई अध्यक्षमा वैधानिकता नदिएपछि पार्टी नेताहरू विभाजित छन् । सुदूरपश्चिममा नेपाली कांग्रेस नेतृत्वको सरकारमा नागरिक उन्मुक्ति सहभागी छ ।
रन्जीता केन्द्रीय गठबन्धनको पक्षमा छिन् । रेशम प्रदेशमा कांग्रेससँगको सहकार्यका पक्षमा छन् । सुदूरपश्चिममा कांग्रेस नेतृत्वको सरकारमा रेशम पक्षका नेताहरू सहभागी छन् भने रञ्जिता पक्षले सरकारबाट फिर्ता हुने निर्णय गरिसकेको छ । यसै विवादका कारण रेशम र रञ्जिताबीच समेत दूरी बढ्दै गएको छ ।
