२२ चैत ,काठमाण्डौ ।
नेकपा माओवादी केन्द्रले इलाम–२ को उपनिर्वाचनमा नेकपा एमालेका उम्मेदवार सुहाङ नेम्वाङलाई सघाउने भएको छ । एमालेको समर्थनमा सरकार संचालन गरिरहेको माओवादीले एमालेका लागि माओवादी केन्द्रबाट उम्मेदवार बनेका धिरेन्द्र शर्मालाई नाम फिर्ता लिन लगाएको छ । माओवादीबाट उम्मेदवार घोषणा गरेका शर्माले एमालेलाई सहयोग गर्ने निर्णय पार्टी केन्द्रमा भएको बताएका छन् ।
‘दुई अध्यक्ष बीच हिजो सहमति भएको रहेछ । केन्द्रबाट निर्देशन आएको छ । अब गठबन्धनका उम्मेदवार जिताउन लाग्छौं, माओवादीका केन्द्रीय सदस्य समेत रहेका शर्माले भनेका छन् । माओवादीले बझाङको प्रदेशसभामा आफूलाई छाड्नुपर्ने शर्तसहित इलाममा सुहाङलाई समर्थन गर्न तयार भएको बताउँदै आएको थियो । तर बझाङको सन्दर्भमा सहमति भयो÷भएन बाहिर आइसकेको छैन ।
यसअघि एमाले अध्यक्ष केपी शर्मा ओली लगायतका नेताहरुले सार्वजनिक रुपमानै माओवादीले इलाममा आफ्नो उमेद्वारलाई सघाउने बताएका थिए । इलाम २ मा गत निर्वाचनमा गठबन्धनका कारण कांग्रेसलाई सघाएको माओवादीले अहिले आफूसंगको गठबन्धनमा रहँदा एमालेलाई सघाउनु पर्ने ओलीले धारणा राखेका थिए । तर त्यसपछि पनि माओवादीले आफ्नो उमेद्वारको नाम सार्वजनिक गरेको थियो ।
अहिले भने आफ्ना उमेद्वारलाई नाम फिर्ता लिन लगाएर एमालेलाई नै सघाउने भएको हो । प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहालले फेरि पनि कम्युनिष्ट एकताको पहल आफूले थालेको बताउने गरेका छन् । यता आफ्नो उमेद्वारी सार्वजनिक भइसकेपछि सुहाङले पनि प्रचण्ड, माधव नेपाल, झलनाथलगायतका नेताहरुसंग भेट गरेका थिए ।
उनलाई ओलीले नै प्रचण्डसंग भेटका लागि लगेका थिए । सो क्रममा सुहाङको पिताको जस्तै नम्र स्वभाव देखेर प्रचण्ड प्रभावित बनेको उनको सचिवालयले जनाएको थियो । यस्तै माधव नेपाल र झलनाथले पनि जितको शुभकामना दिएको बाहिर आएको थियो । इलाम–२ मा १५ बैशाखमा उपनिर्वाचन हुँदैछ । एमालेबाट सुहाङ, राष्ट्रिय स्वतन्त्र पार्टीबाट मिलन लिम्बु, राष्ट्रिय प्रजातन्त्र पार्टीबाट लक्ष्मी गुरुङ, एकीकृत समाजवादीले जीतबहादुर राई, जनमतबाट प्रेमदीप थाम्सुहाङ, पहिचानवादीबाट डगेन्द्रसिंह थेगिमले उम्मेवार बनेका छन् ।
नेपाली कांग्रेसले भने हाल उम्मेदवार घोषणा गरेको छैन । उम्मेदवारको विषयलाई लिएर विवाद भएपछि आकांक्षीसँग शीर्ष नेताले छलफल गरेका छन् । मंगलबार र बुधबार बसेको बैठकमा संस्थापन पक्ष र इत्तरपक्षबीचको अडान कायम रहँदा कांग्रेसले उम्मेदवार चयन गर्न भने सकेको छैन । बुधबार संसदीय बोर्डको बैठकमा सभापति शेरबहादुर देउवाले इलाम–२ मा डम्बर खड्कालाई उम्मेदवार बनाउन प्रस्ताव गरेका थिए ।
महामन्त्री गगन थापा समूहका तर्फबाट भेषराज आचार्यलाई उम्मेदवारी बनाउनुपर्ने अडान रहेको छ । क्षेत्रीय कार्यसमितिको बैठकले भेषराज आचार्य, केशव थापा, डम्बर खड्का, नगेन्द्र कुमाल, रमेश लिङ्देन,चन्द्रमाया लिम्बू र शान्तिकला तामाङको नाम सिफारिस गरेको छ। आकांक्षी धेरै भएपनि मुख्य प्रतिस्पर्धा खड्का र आचार्य रहेका छन्।
खड्का यस अगाडि नेम्वाङसँग हारेका थिए । उनीहरुबीच छलफल गरेपछि आज दिउँसो बस्ने कार्यसम्पादन समितिको बैठकले उपनिर्वाचनको उम्मेदवार तय गर्ने छ । इलाममा यसअघि स्व नेम्वाङले जित हासिल गरेकाले त्यो सिट यथावत राख्न एमालेले माओवादीलाई मनाएको छ । य
द्यपि एमालेका उम्मेदवारको प्रतिस्पर्धा भने गठबन्धनकै रास्वपाका मिलन लिम्बु लगायतसँग हुनेदेखिन्छ । रास्वपाले उपनिर्वाचनमा मित्रवत प्रतिस्पर्धा गर्नुपर्ने बताउँदै आएको छ । इलाममा धरानका स्वतन्त्र मेयर हर्क साम्पाङपनि चुनाव प्रचारमा पुगेका छन् । उनले पहिचानवादी डगेन्द्रसिंह थेगिमलाई समर्थन गरेका छन् ।
