२३ चैत , एजेन्सी ।
पाकिस्तान सरकारले पूर्वप्रधानमन्त्री इमरान खानका लागि जेलमै उच्च सुरक्षाको व्यवस्था गरेको छ । इमरानका लागि रावलपिंडीको अडियाला जेलमा ७ वटा कक्ष छुट्याएको छ । सामान्यतया कारागारमा १० जना कैदीको सुरक्षाका लागि एक जना कर्मचारी तैनाथ हुन्छन् । तर खानको सुरक्षाका लागि मात्रै १४ सुरक्षाकर्मी अडियाला जेलमा छन् । यति मात्र होइन जेलमा इमरान खानका लागि छुट्टै खाना बनाइन्छ । यो अन्य कैदीहरूलाई दिइँदैन ।
पाकिस्तानको पञ्जाब सरकारले बुधबार लाहोर उच्च अदालतमा सुनुवाईको क्रममा यो जानकारी दिएको हो । खानको सुरक्षाका लागि हरेक महिना करिब १२ लाख पाकिस्तानी रुपैयाँ खर्च हुने गरेको सरकारले अदालतमा जानकारी दिएको छ । इमरान खान गत वर्ष अगस्टदेखि पाकिस्तानको जेलमा छन् । तोसखाना मुद्दामा उनलाई ३ वर्ष कैद सजाय सुनाइएको थियो ।
यसबाहेक पाकिस्तानमा यस वर्ष फेब्रुअरीमा भएको चुनावको केही दिनअघि, खानलाई तीनवटा मुद्दामा कुल ३१ वर्षको सजाय सुनाइएको थियो । हाईकोर्टमा सुनुवाईका क्रममा पञ्जाब सरकारका वकिल खालिद इशाकले भने ’जेलमा खानको कोठरी वरपरका ६ सेलहरू उनको लागि आरक्षित गरिएको छ । यसबाहेक त्यहाँ थप सीसीटीभीहरू पनि जडान गरिएको छ ।
इमरानले पाएको धम्कीलाई ध्यानमा राख्दै उनलाई भेट्नेलाई पनि प्रतिबन्ध लगाइएको छ ।’खानको सुरक्षालाई ध्यानमा राख्दै लाहोर उच्च अदालतमा उनलाई पूर्ण सुरक्षा उपलब्ध गराउन माग गरिएको छ । अहिले प्रधानन्यायाधीश मलिक शहजाद अहमद खानले मुद्दाको सुनुवाइ १६ अप्रिलसम्मका लागि स्थगित गरेका छन् । यसअघि इस्लामाबाद उच्च अदालतले खान र उनकी पत्नी बुशरा बीबीलाई तोशाखाना मुद्दामा सुनाइएको १४ वर्षको सजायलाई निलम्बन गरेको थियो ।
गत ३१ जनवरीमा इस्लामावादको ’एकाउन्टिबिलिटी कोर्ट’ ले उनीहरूलाई तोशाखाना मुद्दामा जेल सजाय सुनाएको थियो । इमरान र बुशरालाई १० वर्षसम्म सार्वजनिक पदमा बस्न प्रतिबन्ध लगाइएको थियो भने ७८ करोड ७० लाख जरिवाना गरिएको थियो । पूर्वप्रधानमन्त्री खानमाथि सरकारी उपहारहरू अवैधरूपमा बिक्री गरेको आरोप लागेको थियो । जसलाई तोशाखाना मुद्दाको रूपमा पनि चिनिन्छ ।
