२७ चैत ,काठमाण्डौ ।
प्रमुख प्रतिपक्ष दल नेपाली कांग्रेसको अवरोध पछि प्रतिनिधिसभाको बैठक बुधबार बिहान ११ बजेसम्मका लागि स्थगित भएको छ । मंगलबार बसेको बैठकमा प्रमुख प्रतिपक्षी दल कांग्रेसले संसद अवरोध गरेपछि सभामुख देवराज घिमिरेले १५ मिनेटका लागि बैठक स्थगित गरेका थिए । त्यसपछि उनले दलका प्रमुख सचेतकहरूसँग छलफल गरेका थिए ।
प्रमुख सचेतकसँग बिहान बसेको बैठक र संसद् बैठक स्थगित गरेर बसेको दुवै बैठकमा सहमति नजुटेपछि बुधबारसम्मका लागि बैठक स्थगित गरिएको हो । आजको प्रतिनिधि सभा बैठकमा नेपाली कांग्रेस र राष्ट्रिय स्वतन्त्र पार्टीका सांसद एकसाथ उठेका थिए । बैठकको सुरुमै दुवै दलका सांसद उठेर सभामुख देवराज घिमिरेको ध्यानाकर्षण गराएका थिए ।
संसद्को प्रतिपक्ष दल र सरकार पक्ष दलको बेन्चबाट सांसदहरू उठेपछि सभामुख घिमिरेले सुरुमा कांग्रेस सचेतक सुशीला थिङलाई ५ मिनेट बोल्न समय दिए । कांग्रेसले संसद्मा गृहमन्त्री रवि लामिछाने विरुद्ध बोलेका कुराको प्रतिवाद गर्ने रास्वपाले सङ्केत गरेको थियो । सभामुख देवराज घिमिरेले समय दिएपछि कांग्रेस सचेतक थिङले सहकारी अनियमिततामा उपप्रधान तथा गृहमन्त्री रवि लामिछानेको संलग्नताबारे छानबिन गर्न संसदीय समिति गठनको माग राखिन् ।
तर सरकार गैरजिम्मेवार रुपमा प्रस्तुत भएको भन्दै उनले समिति नबनेसम्म कुनै पनि कामकारबाही अगाडि नबढाउन आग्रह गरिन् । थिङले करोडौ सहकारीको रकम दुरुपयोग, अपचलन र ठगीमा सरकारका मन्त्री नै संलग्न गरेकाले संसदीय छानविन समितिमार्फत छानविन नगरेसम्म प्रतिनिधि सभा बैठक चल्न नदिने चेतावनी दिएकी थिइन ।
लगतै सभामुखले रास्वपा सांसद मनिष झालाई समय दिएका थिए, तर कांग्रेस सांसदहरु उभिएपछि उनले बोल्ने अवसर नै पाएनन् । बैठकमा प्रतिपक्ष र सत्तापक्ष नै उठेपछि सुरुमा प्रतिनिधि सभा बैठक १५ मिनेटका लागि स्थगित भएको थियो । कांग्रेसले गृहमन्त्रीको सहकारी ठगी प्रकरण छानविनका लागि संसदीय समिति गठन गर्न माग गर्दै सदन अवरुद्ध गरेको र कांग्रेसको सो कदमको बिरोधमा सत्तारुढ एमाले र राष्ट्रिय स्वतन्त्र पार्टीका सांसदहरुले पनि उठेर अवरोध गरेपछि बैठक १५ मिनेटका लागि स्थागित गरिएको थियो ।
यसअघि सभामुख घिमिरेलेसंसद बैठक सुचारु गराउनका लागि वातावरण बनाइदिन सबै सांसदहरुलाई पटक पटक आग्रह गरेका थिए । संसदमा एकअर्काप्रति सत्तापक्ष र प्रतिपक्षका सांसदहरुले आवाज उठाईरहदा संसदमा बोल्नका लागि पुगेका उपप्रधान तथा गृहमन्त्री रवि लामिछाने भने दर्शक बनिरहेका थिए ।
