२ वैशाख , एजेन्सी।
इरानले शनिबार राति इजरायलमा भीषण आक्रमण गरेपछि इजरायलमा रहेका नेपालीहरुका बारेमा थप चिन्ता र चासो बढेको छ । हमासको आक्रमणमा परी १० नेपालीले ज्यान गुमाएको र सोही घटनादेखि एक नेपाली अझै बेपत्ता रहेको अवस्थामा इजरायलको पछिल्लो अवस्थालाई लिएर परराष्ट्र मन्त्रालयले इजरायलस्थित नेपाली दूतावासलाई त्यहाँको पछिल्लो अवस्थाको मूल्यांकन गरी रिपोर्ट पठाउन निर्देशन दिएको छ ।
परराष्ट्र मन्त्रालयका प्रवक्ता अमृत राईले इरान र इजरायलबीचको तनाव बढ्दै गए त्यहाँको अवस्था असहज हुने देखिएपछि परराष्ट्रले रिपोर्ट मागेको बताएका छन् । इजरायलमा हाल चार हजार ५०० नेपाली केयरगिभरका रूपमा कार्यरत छन् । केही विद्यार्थी पनि इजरायलमा अध्ययन गरिरहेका छन् । अवस्था बिग्रँदै गए इजरायलमा रहेका नेपालीलाई आपत्कालीन उद्धार गरी ल्याउनुपर्ने हुनसक्छ ।
गएको असोजमा इजरायलमाथि लडाकु समूह हमासले आक्रमण गर्दा १० नेपाली विद्यार्थी मारिएका थिए । त्यति बेला सरकारले इजरायलमा रहेका मध्ये साढे २०० भन्दा बढी नेपालीलाई उद्धार गरी ल्याएको थियो । यसअघि इजरायलस्थित नेपाली दूतावासले त्यहाँ रहेका नेपालीलाई अत्यावश्यक अवस्थामा बाहेक घरबाट बाहिर ननिस्कन अनुरोध गरेको थियो ।
“अत्यावश्यक अवस्थामा बाहेक घरबाट बाहिर ननिस्कन तथा सुरक्षित आश्रयस्थलको सुविधा भएको स्थलको आसपासमै रहन समेत हार्दिक अनुरोध गर्दछौँ,” इजरायलस्थित नेपाली दूतावासद्वारा आइतबार जारी विज्ञप्तिमा उल्लेख छ । इरानले आक्रमण सुरु गरेपछि इजरायली होम फ्रन्ट कमान्डले सर्वसाधारणका निम्ति नयाँ निर्देशन जारी गरेको दूतावासले जनाएको छ ।
नयाँ निर्देशनमा सोमबार राति ११ बजेसम्म लागु हुने गरी शैक्षिक क्रियाकलाप बन्द गर्ने र ठूलो स्तरको सभा÷भेला नगर्न भनिएको छ । नेपाली दूतावासले आवश्यक सुरक्षाका निम्ति नेपालीलाई स्थानीय सुरक्षा ‘प्रोटोकल’को पालना गर्न, आफ्नो क्षेत्रका लागि जारी गरिएका अद्यावधिक सूचना बारेमा जानकार रहन र आफ्नो सुरक्षातर्फ विशेष ध्यान दिन अनुरोध गरेको छ ।
इजरायलमा रहेका नेपालीलाई कुनै अप्ठ्यारो परे दूतावासको द्वितीय सचिव कुमारबहादुर श्रेष्ठलाई ०५२८२८९३०० र सहचारी सञ्जयकुमार साहलाई ०५४५५८२०७७ नम्बरमा फोन गर्न दूतावासले भनेको छ । केही दिनअघि सिरियामा रहेको आफ्नो महावाणिज्य दूतावासमा इजरायलले हवाई आक्रमण गरेपछि इरानले त्यसको बदला लिने घोषणा गरेको थियो ।
बदलास्वरूप इरानले आइतबार बिहान इजरायली भूमिमा ड्रोन र मिसाइल आक्रमण गरेको हो । इजरायली सेनाले इरानले प्रहार गरेका ३०० भन्दा बढी क्रुज मिसाइल र ड्रोनलाई आकाशमै ध्वस्ता पारेको जनाएको छ । इरानले प्रहार गरेका मिसाइल आकाशमै ध्वस्त पार्न अमेरिका र बेलायतले पनि साथ दिएका थिए । यद्यपि इजरायली सेनाले आक्रमण ठूलो मात्रामा नभएको दाबी गरेको छ । इजरायली सेनाले इरानले आक्रमण गर्दा प्रहार गरेका मिसाइलहरू आकाशमै नष्ट गरेको जनाएको छ ।
