७ वैशाख, काठमाण्डौ।
नेपालको आगामी वर्ष हुने एसिया कप क्रिकेट खेल्ने संभावना सकिएको छ । ओमानमा जारी एसीसी प्रिमियर कपको सेमिफाइनलबाटै नेपाल बाहिरिएसँगै नेपालको एसिया कपखेल्ने सपना समेत टुटेको छ । शुक्रवार भएको खेलमा नेपाल यूएईसँग ६ विकेटले पराजित भयो । अल अमारतमा टस हारेको नेपालले पहिला ब्याटिङको जिम्मा पाएको थियो।
अधिकांश नेपाली ब्याट्सम्यानले विर्सनलायक प्रदर्शन गरे। नेपालले केवल एक सय २० रनको लक्ष्य दियो। नेपालले निर्धारित २० ओभरमा ९ विकेट गुमाएर एक सय १९ रन जोडेको थियो। नेपालका ८ ब्याट्सम्यानले दोहोरो अंक छुन सकेनन्। सन्दिप जोराले सर्वाधिक ५० रन जोडे। गुल्सन झाले २० र करन केसीले १७ रन बनाए।
इनिङ्सको पहिलो बलमै कुशल भुर्तेल गोल्डेन डकआउट भएका थिए। रोहित पौडेलले १८ बलमा ५ रन जोडे भने आसिफ शेखले ८ रन बनाए। कुशल मल्ल ३ र दीपेन्द्रसिंह ऐरी ५ रन जोडेर आउट भए। यूएईका जुनैद खान, अलि नासिर र बासिल हमिदले २,२ तथा आयान अफजल खान, मुहम्मद फारुक र ओमिद सफि रहमानले एक एक विकेट लिए।
यूएईले १७ दशमलव २ ओभरमा ४ विकेट गुमाएर लक्ष्य पुरा ग¥यो। ओपनर एलिसान सराफुले सर्वाधिक ५५ रन बनाए। विष्णु सुकुमारनले २८, आसिफ खानले १० र सेयद हैदरले १४ रन बनाए। १२ रन जोड्दा पहिलो विकेट गुमाएको यूएईले दोस्रो विकेटका लागि ४२ रनको साझेदारी गरेको थियो।
गुल्सन झाले २ तथा ललित नारायण राजबंशी र सोमपाल कामीले एक एक विकेट लिए। प्रतियोगिताको विजेता एसिया कपका लागि छनोट हुने छ। नेपालले गत वर्ष यूएईलाई हराएर एसिया कप खेलेको थियो। यसपटक नेपालले समूहगत चरणका सबै ४ खेल जितेर विजेताका रुपमा सेमिफाइनलमा स्थान बनाएको थियो।
प्रतियोगिता विजेताले टी२० एसिया कप र शीर्ष तीन टोलीले एसीसी इमर्जिङ टिम्स एसिया कप खेल्न पाउनेछन् । नेपालले अब हङकङ र ओमानबीचको विजेतासँग तेस्रो स्थानका लागि खेल्नेछ । एसिया कपमा भारत, पाकिस्तान, अफगानिस्तान, श्रीलंका र बंगलादेश हुनेछन् । इमर्जिङ टिम्स एसिया कपमा यी पाँच टेस्टका ए टोलीसँग खेल्ने अवसर हुनेछ ।
