९ वैशाख , एजेन्सी ।
एसिया कप सँगै नेपालको इमर्जिङ एसिया कप खेल्ने सपना पनि विफल भएको छ । ओमानमा हिजो भएको एसीसी प्रिमियर कपको तेस्रो स्थानको खेलमा यसअघि पराजित गरेको हङकङसामू लज्जास्पद खेल प्रर्दशन गरेपछि नेपाल एसियाकपपछि इमर्जिङ एसिया कप पुग्नबाट समेत बन्चित भएको हो । नेपाल हङकङसँग ४ विकेटले पराजित भयो ।
विजयी भएको हङकङ भने इमर्जिङ एसिया कपमा पुगेको छ । यसअघि लगातार दोस्रो पटक एसिया कप खेल्ने लक्ष्यमा युएई बाधक बनेको थियो । उपाधिका लागि आज यूएई र घरेलु टोली ओमान खेल्दैछन् । खेल दिउँसो सवा ४ बजे ओमानको अल अमेरातमा शुरु हुनेछ । आजको विजेता एसिया कपसँगै इमर्जिङ एसिया कपमा पुग्नेछ भने पराजित टोलीलेसमेत इमर्जिङ एसिया कप खेल्ने अवसर पाउनेछ ।
नेपालले दिएको १ सय ४० रनको लक्ष्य पछ्याएको हङकङले लक्ष्य १९.३ ओभरमा ६ विकेट गुमाएर पुरा गर्यो । हङकङलाई अन्तिम दुई ओभरमा जितका लागि १६ रन आवश्यक थियो । अविनाश बोहोराको १९औ ओभरमा एक चौकासहित ८ रन आएपछि हङकङलाई अन्तिम ओभरमा ८ रन चाहिएको थियो ।
ललित राजवंशीको अन्तिम ओभरको पहिलो बलमा नसरुल्लाहले पहिलो बलमा चौका प्रहार गरे भने दोस्रो बलमा २ रन प्रहार गरे । त्यसपछिको बलमा पनि २ रन प्रहार गर्दै हङकङले जित हासिल गर्यो । हङकङको जितमा अंशुमन रथले ६५ रनको नटआउट इनिङ खेले । यस्तै बबर हायतले २६ रन जोडे । नेपालका लागि सोमपाल कामीले ४ ओभरमा ३३ रन दिँदै ३ विकेट लिए ।
यस्तै दीपेन्द्र सिंह ऐरीले ४ ओभरमा २७ रन दिएर २ विकेट लिए । त्यसअघि पछिल्लो खेलमा खराब ब्याटिङ प्रदर्शन गरेको नेपालले टस जितेर ब्याटिङ गर्दै निर्धारित २० ओभरमा ८ विकेट गुमाउँदै १ सय ३९ रन बनाएको थियो । नेपालका लागि दीपेन्द्र सिंह ऐरीले २९ बलमा ४ चौका र ३ छक्कासहित सर्वाधिक ४४ रन बनाएपनि अन्य ब्याटर चल्न सकेनन् ।
नेपालका ओपनर कुशल भुर्तेल सेमिफाइनलको खेल जस्तै डक आउट भए । सोमपाल कामी १२ रन बनाएर क्याच आउट भए । अर्का ओपनर आसिफ शेख पनि ५ रनमा शिकार बने । आठौँ ओभरमा कप्तान रोहित पौडेलले २१ रन जोडे । कुशल मल्ल पनि १३ रन मात्र बनाउन सके । सन्दिप जोरा र गुलशन झाले क्रमशः २२ र ६ रन बनाएर रनआउट भए ।
करण केसी पनि ३ रन मात्र बनाएर एहसान खानको बलमा एलबिडब्लुमा फसे । दीपेन्द्र र ललित राजबंशी नटआउट रहेका थिए । ललितले ३ बलमा २ रन बनाए । हङकङका लागि आयुष शुक्लाले ३ विकेट लिए भने अतिक इकबाल, यासिम मुर्तजा र एहसान खानले १–१ विकेट लिए । इमर्जिङ एसिया कपमा प्रिमियर कपका शीर्ष तीन टोली सहित भारत, पाकिस्तान, बंगलादेश, श्रीलंका र अफगानिस्तानको ए टोलीको सहभागिता रहनेछ ।
हङकङ सहित फाइनल पुगेका ओमान र युएई सो प्रतियोगितामा छनोट भएका हुन् । प्रिमियर कपको विजेताले एसिया कप खेल्नेछ। नेपालले अब घरेलु मैदानमा वेस्टइन्डिज एसँग मैत्रीपूर्ण सिरिज खेल्नेछ । त्यसपछि विश्वकपका लागि प्रस्थान गर्नेछ ।
