Nepal Times
Nepal Times
3
Shares

सातै प्रदेशमा पानी पर्ने, काठमाडौंको वायु ‘अति अस्वस्थकर’

सातै प्रदेशमा पानी पर्ने, काठमाडौंको वायु ‘अति अस्वस्थकर’

२१ वैशाख ,काठमाण्डौ।

तराईका अधिकांश जिल्लाहरुमा अधिकतम तापक्रम ४० डिग्रीसम्म पुगेर जनजिवन नै प्रभावित बनिरहेका बेला आगामी साता पानी पर्ने प्रक्षेपण सार्वजनिक भएको छ । जल तथा मौसम विज्ञान विभागले आगामी साता हल्कादेखि मध्यम खालको वर्षा हुने प्रक्षेपण सार्वजनिक गरेको हो ।

मौसम पूर्वानुमान महाशाखाले सार्वजनिक गरेको साप्ताहिक कृषि–मौसम पूर्वानुमान बुलेटिनमा सातै प्रदेशमा हल्कादेखि मध्यम वर्षा हुने उल्लेख छ । पश्चिमी न्यून चापीय प्रणालीले बादलहरु नेपालसम्म ल्याउने, केही स्थानमा पानी पर्ने र अधिकतम तापक्रम केही घट्ने छ । अधिकतम तापक्रम घट्दा अहिलेको तुलनामा केही शीतल महसुस हुने पूर्वानुमान रहेको छ ।

यस वर्षको अप्रिल महिना सन् १९०१ पछिकै गर्मी महिनाको रुपमा विश्वमा दर्ज भएको तथ्यांकहरु सार्वजनिक भइरहेका छन् । नेपालमा पनि प्रचण्ड गर्मी र तातो हावाका कारण जनजीवन प्रभावित भएको छ । बढ्दो गर्मीमा देशका विभिन्न स्थानका वनमा अझै डढेलो अनियन्त्रित रहेको छ । डढेलो र बढ्दो धुलो धुवाका कारण प्रदूषण समेत बढ्दै गएको छ ।

पानी परेपछि डढेलो नियन्त्रण र प्रदूषण कम हुन् सक्ने छ । राष्ट्रिय विपद न्यूनीकरण तथा व्यवस्थापन प्राधिकरणका प्रमुख अनिल पोखरेलले पनि आइतबारपछि पानी पर्ने सम्भावना रहेको भन्दै त्यसबाट डढेलो नियन्त्रणमा सहयोग मिल्नेमा आशावादी रहेको बताएका छन् । काठमाडौंको वायु शुक्रबार पुनः ‘अति अस्वस्थकर’ बनेको छ ।

वातावरण विभागको सूचकांकमा शुक्रबार बिहान १० बजे शंखपार्कको एयर क्वालिटी इन्डेक्स ९एक्यूआई० २४६ पुगेको छ । चितवनको भरतपुरको वायु पनि अति अस्वस्थकर देखिएको छ । त्यहाँ बिहान १० बजे एक्यूआई २४१ मापन गरिएको छ । विभागका अनुसार, काठमाडौंमा बिहीबार २४ घण्टाको औसत एक्यूआई १७५ थियो । सोही अवधिमा भरतपुरको एक्यूआई १५४ थियो ।

यी दुई सहरपछि शुक्रबार कास्कीको पोखरा, मुगुको राराक्षेत्र, कञ्चनपुरको महेन्द्रनगर पनि उच्च प्रदूषित छन् । ती स्थानको एक्यूआई १५८ देखि १८६ सम्म पुगेको विभागको रेकर्ड छ । यस वर्ष हिउँदयाममा पनि सरदर ६० प्रतिशत पानी पर्नुपर्नेमा करिब २१ मिलिमिटर मात्र पानी परेको जल तथा मौसम विज्ञान विभागले जनाएकोछ । हिउँदपछि सुरु भएको प्रिमनसुन पनि अहिलेसम्म सुक्खा छ । मार्चदेखि मे महिनासम्मको अवधिलाई प्रिमनसुन अवधि मानिन्छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.