१ जेठ ,एजेन्सी ।
भारतको मुम्बईमा भीषण आँधीका कारण होर्डिङ बोर्ड ढल्दा ज्यान गुमाउनेको सङ्ख्या १४ जना पुगेको छ । सोमबार १५ हजार वर्गफिटको होर्डिङ बोर्ड खसेर भएको दुर्घटनामा ७० जनाभन्दा धेरै घाइते भएका छन् । ७० मिटर लामो होर्डिङ बोर्ड पेट्रोल स्टेसन र आसपासमा रहेका घरमा खसेको हो ।
प्रहरीका अनुसार घाटकोपर (ई) क्षेत्रको समता कोलोनीमा रहेको रेलवे पेट्रोल पम्प नजिकै राखिएको होर्डिङ सोमबार अपराह्न ४ः३० बजे एक्कासी आएको भीषण हावाहुरीले खसेको हो । वर्षा र हावाहुरी आएपछि पेट्रोल पम्पमा बसेका मानिसको भीडमा होर्डिङ बोर्ड खसेको थियो ।
होर्डिङ बोर्ड पेट्रोल पम्पमा ढलेको र वर्षाका कारण ओत लिएका मानिसहरूलाई लागेको भारतीय मिडियाहरुले उल्लेख गरेका छन् । यस्तै वर्षा र धुलोको आँधीले रुखहरू ढलेसँगै बोर्ड खस्दा गाडीहरू च्यापिएका छन् । सोमबार साँझ जिमखाना नजिक भएको यो दुर्घटनापछि राष्ट्रिय प्रकोप प्रतिक्रिया बल (एनडीआरएफ), दमकल र प्रहरी टोलीलाई तत्काल राहत उपलब्ध गराउन घटनास्थलमा पठाइएको थियो ।
हाल ४३ घाइतेको अस्पतालमा उपचार भइरहेको छ । ३१ घाइते अस्पतालबाट डिस्चार्ज भएका छन् । एक जना घाइतेको अवस्था गम्भीर रहेको बताइएको छ । मुम्बईका मुख्यमन्त्री एकनाथ शिंदेले दुर्घटनास्थलको निरीक्षण गरेका छन् । उनले अस्पतालमा उपचार गराइरहेकाहरुसंग पनि भेट गरेका छन् ।
मुख्यमंत्रीले घटनामा फसेकाहरुको उद्यार गर्नु आफ्नो पहिलो प्राथमिकता भएको जनाएका छन् । साथै उनले मुंबईमा जति पनि होर्डिंग छ, तिनको स्पेशल स्ट्रक्चरल अडिट गरिने पनि बताएका छन् । यो दुर्घटनाका लागि जिम्मेवार रहेकाविरुद्ध हत्या आरोपमा मुद्या चलाइने पनि उनले बताएका छन् । मृतकका परिवारलाई तत्काल ६ लाख रुपैया दिइने पनि उनले बताएका छन् । आँधीको असर सडक, हवाई र रेल मार्ग पनि परेको छ ।
