३ जेठ , एजेन्सी ।
भारतीय फुटबल लिजेन्ड, राष्ट्रिय टोलीका कप्तान सुनील क्षेत्रीले सन्यास घोषणा गरेका छन् । उनी भारतबाट सर्वाधिक गोल गर्ने कीर्तिमानी स्ट्राइकर हुन् । सामाजिक सञ्जाल एक्समार्फत एउटा भिडिओ जारी गर्दै क्षेत्रीले आउँदो जुन ६ मा हुने फिफा विश्वकप क्वालिफायरको कुवेतविरुद्धको खेल आफ्नो अन्तिम हुने बताएका छन् ।
‘मेरो १९ वर्षको यात्रा एउटा जिम्मेवारी, दवाव र अदम्य खुशीको समिश्रण थियो । मैले अब कुवेत विरुद्धको खेल मेरो सम्भवत अन्तिम हुनेछ,’ क्षेत्रीले भनेका छन् । भारतीय फुटबलका पर्यायको रुपमा रहेका ३९ वर्षीय क्षेत्रीले देशका लागि ९४ अन्तर्राष्ट्रिय गोल गरेका छन् । अन्तर्राष्ट्रिय फुटबलमा सक्रिय खेलाडीमध्ये उनी गोल स्कोरिङको हिसाबले लियोनल मेस्सी र रोनाल्डोभन्दा पछाडि तेस्रो स्थानमा छन् ।
अलटाइम फुटबलरहरुमध्ये चौंथो स्थानमा छन् । सन २००२ मा मोहन बगानबाट उनले फुटबलको यात्रा प्रारम्भ गरेका थिए । उनी सन् २०१० मा अमेरिकाको क्यान्सस सीटी विजार्ड तथा सन् २०१२ मा पोर्चुगलको स्पोर्टिङ सीपीमा आवद्ध भए । भारतमा उनले इस्ट बंगाल, डेम्पो, मुम्बई सीटी हुँदै अहिले बैंगलुरु एफसीबाट खेलिरहेका छन् । क्षेत्रीको अन्तर्राष्ट्रिय फुटबल करिअर निकै शानदार छ ।
यू–२० र यू–२३ टोलीबाट आफ्नो परिचय बनाएका उनले सन् २००५ मा सिनिअर टोलीमा डेब्यू गरेका थिए।उनले एकल बलबुतामा भारतलाई थुप्रै अन्तर्राष्ट्रिय उपाधिहरु जिताएका छन् । सन् २००७, २००९ र २०१२ को नेहरु कप, सन् २०११, २०१५ र २०२१ को साफ च्याम्पियनसीपमा भारतलाई विजेता बनाउन क्षेत्रीको ठूलो हात थियो ।
उनले सन् २००८ को एएफसी च्यालेन्ज कपमा पनि भारतलाई जिताएका थिए, जसले गर्दा भारतले २७ वर्षपछि एएफसी एसिएन कपमा भाग लिन पाएको थियो । पूर्वकप्तान तथा स्ट्राइकर भाइचुङ भुटियाको सन्न्यास पछि भारतीय टोलीमा उनले अग्रपंतीको जिम्मेवारी लिएका थिए। उनको पहिलो अन्तराष्ट्रिय गोल पाकिस्तानविरुद्ध थियो । भारतीय टोलीबाट १५० खेल खेलेका उनले ९४ अन्तर्राष्ट्रिय गोल गरेका छन्।
