३ जेठ ,एजेन्सी ।
आगामी जुन २ बाट सुरु हुने विश्वकप क्रिकेटको खेल तालिका सार्वजनिक भएको छ । तालिका अनुसार नेपालले आफ्नो पहिलो खेल ४ जुनमा खेल्ने छ । सन् २०१४ पछि पहिलो पटक विश्वकप खेल्न लागेको नेपालले आफ्नो पहिलो खेलमा नेदरल्यान्ड्ससँग प्रतिस्पर्धा गर्नेछ । नेपाल र नेदरल्यान्ड्सबीचको खेल अमेरिकाको डल्लासस्थित ग्रान्ड प्रेयर क्रिकेट स्टेडियममा राति ९ः१५ बजेबाट सुरु हुनेछ ।
यस्तै नेपालले आफ्नो दोस्रो खेलमा श्रीलङ्कासँग जुन १२ मा खेल्ने छ भने तेस्रो खेल दक्षिण अफ्रिकासँग १५ जुनमा र चौथो खेल बङ्गलादेशसँग १७ जुनमा प्रतिस्पर्धा गर्नेछ । अमेरिका र वेस्ट इन्डिजमा संयुक्त रूपमा आयोजना हुन लागेको सन् २०२४ को आईसीसी ट्वान्टी– २० विश्वकपको नेपाल समूह ‘डी’ मा रहेको छ । नेपालसँगै यस समूहमा नेदरल्यान्ड्स, दक्षिण अफ्रिका, श्रीलङ्का र बङ्गलादेश रहेका छन् ।
रोहित कुमार पौडेलको कप्तानीमा नेपाली टोली यसअघि नै वेस्ट इन्डिज हुँदै अमेरिकाका लागि प्रस्थान गरिसकेको छ । अब यो टोलीमा नेपालका स्टार स्पिनर सन्दीप लामिछाने पनि समेटिने सम्भावना बढेको छ । बुधबार पाटन उच्च अदालतले बलात्कार मुद्यामा सन्दीपलाई सफाइ दिएसंगै नेपाल क्रिकेट संघ (क्यान) ले पनि उनको निलम्बन फुकुवा गरेको छ ।
अब सन्दीपलाई अमेरिका र वेष्टइण्डिज पठाउने तयारी सुरु गरेको क्यानका कोषाध्यक्ष पदम खड्काले जानकारी दिए । आईसीसीको नियमअनुसार विश्वकपमा २५ मेसम्म कुनै पनि टोलीले खेलाडी परिवर्तन गर्न सक्छ । नेपाली टोली हाल वेष्टइण्डिजमा अभ्यासमा व्यस्त छ । नेपालले सन्दीपलाई पठाउँदा अन्तिम १५ बाट एक खेलाडी भने बाहिर गर्नुपर्छ ।
कुन खेलाडी बाहिर हुने कप्तान रोहित पौडेल र मुख्य प्रशिक्षक मोन्टी देशाईमा भरपर्ने कोषाध्यक्ष खड्काले बताए । अन्तर्राष्ट्रिय क्रिकेट परिषद् (आईसीसी) सँग एक जना खेलाडी प्रतिस्थापनका लागि अनुमति माग्दै पत्राचार गरिएको क्यान स्रोतले बताएको छ । स्रोतका अनुसार अमेरिका पठाउनुअघि सन्दीपको फिटनेस परीक्षण गरिने छ ।
क्यानका स्ट्रेन्थ एन्ड कन्डिसन एक्स्पर्ट अब्जुल सतार अमेरिकामा छन् । उनले पठाएका गाइडलाइन अनुसार सन्दीपको फिटनेस हेरिने छ ।सन्दीपले अन्तिमपटक प्रतिस्पर्धात्मक क्रिकेट गत वर्ष पुसमा खेलेका थिए । वीरगञ्जमा आयोजित प्रो क्लव च्याम्पियनसीपमा पर्सा ११ को नेतृत्व गरेका उनले टीमलाई फाइनलसम्म पु¥याएका थिए । तर, जिल्ला अदालतले दोषी ठहर गरेपछि उनले फाइनल खेल्न पाएनन् । फाइनलमा उनको टीम पराजित भएको थियो ।
