२४ जेठ , काठमाण्डौ ।
रुसका राष्ट्रपति भ्लादिमिर पुटिनले पश्चिमा देशमा आक्रमण गर्ने योजना बनाएका देशहरुलाई मस्कोले हतियारहरु दिन सक्ने चेतवानी दिएका छन् । पुटिनले युक्रेनलाई पश्चिामा देशहरुले लामो दुरीको हतियारहरु पठाएकोप्रति आलोचना गर्दै यस्तो बताएका हुन् । संयुक्त राज्य अमेरिका लगायतका धेरै देशहरुले युक्रेनलाई रुसभित्रका टार्गेट आक्रमण गर्न अनुमति दिइसकेका छन् ।
यस्तो कार्यले गम्भीर समस्या निम्त्याउन सक्ने पुटिनले विदेशी पत्रकारहरुसंगको अन्तक्रियामा भनेका छन् । यदी कसैले हाम्रो भूभागमा आक्रमण गरी हाम्रालागि समस्या खडा गर्न युद्धक्षेत्रमा त्यस्ता हतियारहरु उपलब्ध गराउन सम्भव छ भन्ने सोच्दछ भने हामीसंग पनि विश्वका संवेदनशील क्षेत्रमा आक्रमण गर्न सोही वर्गका हतियारहरु उपलब्ध गराउने अधिकार किन छैन ? रुसी राष्ट्रपतिले भने, अर्थात प्रतिक्रिया असम्मत हुन सक्छ । हामी यसको बारेमा सोच्दैछौं । उनले मस्कोले कुन कुन देशलाई हतियार आपूर्ती गर्न सक्छ भन्नेबारेमा भने केही पनि खुलाएनन् ।
पुटिनले जर्मनीतर्फ संकेत गर्दै चेतावनी पनि दिए । जर्मनीले हालै युक्रेनलाई लामो दूरीका जर्मन निर्मित हतियारहरुद्वारा रुसभित्रका टार्गेटहरुमा प्रहार गर्न स्वीकृति दिएको थियो । यदि उनीहरु रुसी भूमिमा प्रहार गर्न त्यहाँ धेरै मिसाइलहरु हुनेछन् भने यसले निश्चितरुपमा रुस–जर्मनी सम्बन्धलाई बिगार्छ, पुटिनले भने । अमेरिकी राष्ट्रपति जो बाइडेनले युक्रेनलाई रुसका टार्गेटहरुमा प्रहार गर्न अमेरिकामा बनेका हतियारहरु प्रयोग गर्न अनुमति दिएका छन् ।
तर युक्रेनले ती हतियारहरु खार्किभक्षेत्र नजिक मात्र प्रयोग गर्न पाउँछ । ह्वाइट हाउसले युक्रेनले रुसको भूमिमा लामो दूरीका एटीएसीएमएस मिसाइल प्रयोग गर्न नसक्ने स्पष्ट पारेको छ । यद्यपी युक्रेनले हालैका दिनहरुमा रुसभित्र आक्रमण गर्न अमेरिकी हतियारहरु प्रयोग गरेको एक अमेरिकी सिनेटर तथा पश्चिमी अधिकारीले बुधबार एपीलाई बताएका छन् ।
युक्रेनको उत्तरी सिमानामा रुसी आक्रमणपछि खार्किभको उत्तरपूर्वी भागमा तिब्ररुपमा युद्ध जारी छ । युक्रेनको दोस्रो सहर खार्किभ सीमाबाट ३० किलोमिटर मात्रै टाढा छ । यसबीच बेलायतका विदेशमन्त्री लर्ड क्यामरुपले बेलायती हतियार कसरी प्रयोग गर्ने भन्ने निर्णय युक्रेनले नै गर्ने र रुसी भूमिमा प्रहार गर्ने अधिकार उसंग रहेको बताएका छन् ।
यता युक्रेनले भने उत्तर कोरीयाली क्षेप्यास्त्रहरु युक्रेनी भूभागभित्र प्रयोग भइरहेको बताएको छ । पश्चिमी गुप्तचर एजेन्सीहरुले युद्धमा रुसले इरानमा बनेका ड्रोनहरु प्रयोग गरिरहेको बताएका छन् । रुसले फेब्रुअरी २०२२ मा युक्रेनमाथि फुल स्केलमा आक्रमण सुरु गरेको थियो ।
पुटिनले वार्षिक सेन्ट पिटर्सबर्ग इन्टरनेशनल इकोनोमिक फोरममा विदेशी पत्रकारहरुसंग कुरा गरेका थिए । सोक्रममा मस्कोले कहिल्यै पनि आणविक हतियार प्रयोग गर्दैन भन्ने सोच्नु पश्चिमा देशहरुको गलत सोचाइ भएको पनि उनले चेतावनी दिएका छन्।
