युरोकपको सेमिफाइनलमा पेनाल्टी विवाद के हो ?

२७ असार, एजेन्सी ।

युरोकप फुटबलको आज विहान सम्पन्न दोस्रो सेमिफाइनल खेलमा इङ्गल्यान्डले नेदरल्यान्ड्सलाई २–१ गोलले हराउदै उपाधि नजिक पुगेको छ । अब उसले उपाधिका लागि स्पेनको समाना गर्ने छ । निर्धारित समयको अन्तिम मिनेटमा ओले वाट्किन्सले निर्णायक गोल गरेपछि नेदरल्यान्ड्सविरुद्ध २–१ को जित निकाल्दै इंग्ल्यान्ड लगातार दोस्रो पटक युरोपियन च्याम्पियनसिपको फाइनलमा प्रवेश गरेको छ ।

जर्मनीको डर्टमन्डमा भएको खेलमा डच टिमले अग्रता बनाए पनि त्यसलाई कायम राख्न सकेन । खेलको सातौँ मिनेटमा नै जाभी सिमोन्सको गोलमा नेदरल्यान्ड्सले अग्रता बनाएको थियो । सिमोन्सले १८ यार्ड बक्स बाहिरबाट सेकेन्ड बारमा उत्कृष्ट गोल गरेका थिए । तर, नेदरल्यान्ड्सको यो अग्रता लामो समय टिक्न सकेन । १८औँ मिनेटमा कप्तान ह्यारी केनले प्राप्त पेनाल्टीलाई सदुपयोग गरेपछि इंग्लिस टिम खेलमा फर्किएको थियो ।

नेदरल्यान्ड्सका डेन्जेल डम्फ्रिजले १८ यार्ड बक्सभित्र ह्यारी केनमाथि नै फाउल गरेपछि इंग्ल्यान्डले भिडियो असिस्टेन्ट रेफ्री (भार)को सहयोगमा पेनाल्टी जितेको थियो । जसमा केनले कुनै गल्ती गरेनन् । निर्धारित समयको अन्तिम मिनेटमा वाट्किन्सले गोल गर्दै इंग्ल्यान्डलाई २–१ को अग्रतामा राखे । कोल पाल्मेरको पासलाई नियन्त्रणमा राख्दै वाट्किन्सले पेनाल्टी बक्सबाट आकर्षक गोल गरे ।

इंग्ल्यान्डले दोस्रो हाफमा डच टिमविरुद्ध यो नै एकमात्र ‘अन टार्गेट’ प्रहार थियो । वाट्किन्सले ८१औँ मिनेटमा कप्तान ह्यारी केनको स्थानमा मैदान प्रवेश गर्ने अवसर पाएका थिए । वाट्किन्सको यही गोल निर्णायक बन्दा ग्यारेथ साउथगेटको प्रशिक्षणमा रहेको इंग्लिस टिम लगातार दोस्रो पटक युरोपियन च्याम्पियनसिपको फाइनलमा प्रवेश गरेको हो । त्यसअघि खेलको ८०औँ मिनेटमा बुकायो साकाले गोल गरे पनि भारबाट खारेज हुँदा इंग्ल्यान्ड अग्रता लिनबाट चुकेको थियो ।

इंग्ल्यान्डले अब उपाधिका निम्ति स्पेनसँग प्रतिस्पर्धा गर्नेछ । स्पेनले यसअघि पहिलो सेमिफाइनलमा फ्रान्सविरुद्ध २–१ को जित निकाल्दै फाइनलमा स्थान बनाएको थियो । त्यो खेलमा भएको एउटा पेनाल्टी गोल अहिले निकै चर्चाको विषय बनेको छ । यता इंग्ल्यान्डले पाएको पेनाल्टीलाई लिएर विवाद सृजना भएको छ । नेदरल्यान्डका प्रशिक्षक रोनाल्ड कोएम्यानले पनि इङ्गल्यान्डलाई पेनाल्टी प्रहारको अवसर दिने रेफ्रीको निर्णयको आलोचना गरेका छन् ।

खासमा खेल सुरु भएको सातौँ मिनेटमै नेदरल्यान्ड्सले अग्रता लिएको थियो । डच टोलीका लागि जाभी सिमोन्सले गोल गरेका थिए । त्यसपछि खेलको १८औँ मिनेटमा इङ्गल्यान्डका कप्तान ह्यारी केनले डच टोलीको पेनाल्टी बक्स भित्रबाट एउटा शक्तिशाली प्रहार गरेका थिए । त्यो प्रहार गोलमा परिणत हुन सकेन । तर, त्यसअघि नै नेदरल्यान्ड्सका रक्षापँक्तिका खेलाडी डेन्जल डमफ्रिजबाट ‘फल’ भएको भन्दै इङ्गल्यान्डका खेलाडीले पेनाल्टी प्रहारको अवसर मागेका थिए ।

मैदानमा रहेका रेफ्री फेलिक्स जवायरले इङ्गल्यान्डलाई पेनाल्टी प्रहारको अवसर दिएनन् । त्यसपछि भिडियो असिष्टेन्ट रेफ्री (भीएआर) ले भने इङ्गल्यान्डलाई पेनाल्टी प्रहारको अवसर प्रदान गर्यो । त्यही अवसरलाई सदुपयोग गर्दै इङ्गल्यान्डले पेनाल्टी प्रहारबाट जवाफी गोल ग¥यो । त्यसपछि खेलको अन्तिम समयमा ओली वाट्किन्सले अर्को गोल थप्दै इङ्गल्यान्डलाई फाइनलमा पु¥याएका थिए ।

इङ्गल्यान्डलाई पेनाल्टी प्रहारको अवसर दिने सोही निर्णयलाई लिएर डच टोलीका प्रशिक्षक कोएम्यानले रेफ्रीको आलोचना गरेका हुन् । ‘मैले पनि खेल नजिकबाट नियालेको थिएँ । मेरो विचारमा त्यो कुनै पनि हालतमा पेनाल्टी थिएन । केनले बल प्रहार गरिसकेपछि मात्र बुटले खुट्टामा छोएको देखिन्छ । अन्ततः त्यही अप्रिय निर्णय नै हाम्रो हारको कारण बन्न पुग्यो,’ प्रशिक्षक कोएम्यानले भनेका छन्, ‘अवस्था यस्तै निराशाजनक रहने हो भने हामीले फुटबलको रमाइलो पक्ष गुमाउने छौँ ।’

नेदरल्यान्ड्स र इङ्गल्यान्डबिचको खेलमा रेफ्रीको भूमिका निर्वाह गर्ने फेलिक्स यसअघि खेल मिलेमतो प्रकरणमा सजाय पाइसकेका व्यक्ति हुन् । सन् २००५ मा सहायक रेफ्री हुँदा खेल मिलेमतो गरेको आरोप पुष्टि भएपछि उनी ६ महिनाको प्रतिबन्धमा परेका थिए । इंग्लिस टिमले युरो–२०२० मा पनि फाइनलसम्मको यात्रा तय गरेको थियो ।

तर, उपाधि भिड्न्तमा इटालीसँग पेनाल्टी सुटआउटमा निराश बन्दा इंग्ल्यान्डले उपविजेतामा चित्त बुझाएको हो । सन् १९६८ देखि युरोपियन च्याम्पियनसिपमा प्रतिस्पर्धा गर्दै आएको भए पनि इंग्ल्यान्डले हालसम्म उपाधि भने जित्न सकेको छैन ।