६ साउन, काठमाण्डौ ।
नेपाल राष्ट्र बैंकले आज(साउन ६ गते)का लागि विदेशी मुद्राको विनिमयदर सार्वजनिक गरेको छ । जसअनुसार आज एक अमेरिकी डलरको खरिददर १३३.५७ रुपैयाँ र बिक्रीदर १३४.१७ रुपैयाँ कायम भएको छ । यो दर हालसम्मकै उच्च हो । यसअघि गत असार ७ गते र साउन ४ गते एक अमेरिकी डलरको बिक्रीदर १३४.१५ रुपैयाँ कायम भएको थियो ।
आज एक यूरोको खरिददर १४५.४७ रुपैयाँ र बिक्रीदर १४६.१२ रुपैयाँ निर्धारण भएको छ । एक पाउण्ड स्टर्लिङको खरिददर १७२.६२ रुपैयाँ र बिक्रीदर १७३.३९ रुपैयाँ कायम भएको छ । यसैगरी एक अष्ट्रेलियन डलरको खरिददर ८९.४४ रुपैयाँ र बिक्रीदर ८९.८४ रुपैयाँ रहेको छ ।
१० जापानी येनको खरिददर ८.४८ रुपैयाँ र बिक्रीदर ८.५२ रुपैयाँ, एक युएई दिरामको खरिददर ३६.३७ रुपैयाँ र बिक्रीदर ३६.५३ रुपैयाँ, एक चिनियाँ युआनको खरिददर १८.३७ रुपैयाँ र बिक्रीदर १८.४६ रुपैयाँ ,एक मलेसियन रिंगेटको खरिददर २८.४९ रुपैयाँ र बिक्रीदर २८.६२ रुपैयाँ, एक कतारी रियालको खरिददर ३६.६३ रुपैयाँ र बिक्रीदर ३६.७९ रुपैयाँ, १०० कोरियन वनको खरिददर ९.६२ रुपैयाँ र बिक्रीदर ९.६७ रुपैयाँ र एक कुवेती डिनारको खरिददर ४३६.७३ रुपैयाँ र बिक्रीदर ४३८.६९ रुपैयाँ कायम भएको छ ।
यता अन्तराष्ट्रिय बजारमा कच्चा तेलको मूल्य भने एक महिनामै न्यून कायम भएको छ । पछिल्लो कारोबारमा ब्रेन्ट क्रुडको मूल्य २.९ प्रतिशत अर्थात प्रतिब्यारेल २.४८ डलरले घटेको छ । यससँगै ब्रेन्ट क्रुडको मूल्य प्रतिब्यारेल ८२.६३ डलरमा झरेको छ । यस्तै डब्लूटीआई क्रुडको मूल्य पनि ३.२५ प्रतिशत अर्थात प्रतिब्यारेल २.६९ डलरले घटेको छ ।
यो गिरावटसँगै डब्लूटीआई क्रुडको मूल्य प्रतिब्यारेल ८०.१३ डलर कायम भएको छ । लगानीकर्ताले मध्यपूर्वको गाजामा युद्धविराम हुन सक्ने सम्भावनालाई आधार मानेर कारोबार गर्दा कच्चा तेलको मूल्यमा कमी आएको अन्तराष्ट्रिय मिडियाले जनाएका छन् । गाजामा तनाव बढे यता विश्व आपूर्ति श्रृंखला प्रभावित हुन सक्ने भन्दै लगानीकर्ताले कच्चा तेलको मूल्यमा रिस्क प्रिमियम थप गरेका थिए ।
यसका साथै बलियो बनेको अमेरिकी डलरका कारण समेत कच्चा तेलको मूल्यमा गिरावट आएको छ । गत शुक्रबार माइक्रोसफ्टको सफ्टवेयरमा आएको समस्याका कारण विश्वभरका विभिन्न उद्योग, हवाई कम्पनी, बैंक, स्वास्थ्य सेवा तथा मिडिया क्षेत्र प्रभावित बनेको थियो । यस्तै अन्तराष्ट्रिय बजारमा सुनको मूल्यमा पनि पहिरो गएको छ । गत साता हालसम्मकै उच्च अर्थात प्रतिऔंस २ हजार ४८३ डलर पुगेको सुनको मूल्यमा व्यापक गिरावट आएको हो ।
अन्तराष्ट्रिय बजारमा सुनको मूल्य १.६८ प्रतिशत अर्थात प्रतिऔंस ४१.०५ डलरले घटेको छ । यो गिरावटसँगै सुनको मूल्य प्रतिऔंस २ हजार ४००.७८ डलरमा झरेको छ । आज चाँदीको मूल्यमा पनि गिरावट आएको छ । अन्तराष्ट्रिय बजारमा चाँदीको मूल्य १.८१ प्रतिशत अर्थात प्रतिऔंस ०.५४ डलरले घटेको छ । चाँदीको मूल्य प्रतिऔंस २९.२१ डलरमा कारोबार भईरहेको छ ।
यससँगै अन्तराष्ट्रिय बजारमा सुनको मूल्य एक साताको अवधिमा १ प्रतिशतले घटेको छ । यो साता सुन ट्रेडरको सेन्टिमेन्टमा व्यापक उतारचढाव आयो । यस्तो हुनुमा विभिन्न कारणले भूमिका खेलेका छन् । वर्तमान समयमा चीनको अर्थतन्त्र अपेक्षा विपरीत सुस्त गतिमा चलिरहेको छ ।
यस्तै आगामी नोभेम्बर ५ मा हुन गईरहेको अमेरिकी राष्ट्रपति निर्वाचनमा डोनाल्ड ट्रम्पले जित्ने सम्भावना बढेसँगै डलरको मूल्य समेत वृद्धि भईरहेको छ । यी कारणले सुनको मूल्यमा गिरावट आएको छ । डलरको मूल्य एक साताको अवधिमा ०.२६ प्रतिशतले बढेको छ । यसका अतिरिक्त अमेरिकी राष्ट्रपति निर्वाचनमा जो बाइडेनले नाम फिर्ता लिन सक्ने सम्भावना समेत उच्च बनेका कारण सुनको मूल्य प्रभावित बनेको छ ।
डेमोक्रयाटिक पार्टीका उच्च तहका नेताहरुले ट्रम्पको हत्या प्रयासपश्चात बाइडेनले ट्रम्पलाई पराजित गर्ने सम्भावना नरहेको दाबी गरेका छन् । गत बिहिबार अन्तराष्ट्रिय मुद्रा कोषले अमेरिकाको केन्द्रीय बैंकले सन् २०२४ को अन्त्यसम्म ब्याजदरमा कटौती गर्न नुहुने प्रतिवेदन सार्वजनिक गरेको थियो ।
