१४ साउन , एजेन्सी ।
पेरिस ओलम्पिक २०२४ मा आज पनि दुई नेपाली खेलाडीले प्रतिस्पर्धा गर्दैछन् । जसमा जुडो खेलाडी मनिता श्रेष्ठ प्रधानले महिला ५७ केजीमुनि तौलमा आज प्रतिस्पर्धा गर्दैछिन् । उनले पहिलो खेलमा सर्बियाकी मारिया पेरिसिकको सामना गर्नेछिन् ।
यो खेल नेपाली समय अनुसार दिउँसो १ः४५ बजे हुनेछ । यस्तै ब्याडमिन्टन खेलाडी प्रिन्स दाहालले समूह चरणमा आफ्नो दोस्रो खेल आज खेल्नेछन् । मेन्स सिंगल्सको समूह पी मा रहेका प्रिन्सले आयरल्याण्डका एनहात गुएनसँग प्रतिस्पर्धा गर्नेछन् ।
उक्त खेल आज मध्यान्न सुरु हुनेछ । प्रिन्स समूहको पहिलो खेलमा विश्व नम्बर दुई डेनिस खेलाडी भिक्टोर एक्सेलसनसँग २–० ले पराजित भएका थिए । गुएनले भने पहिलो खेलमा इजरायलका मिसा जिरब्यानलाई २–१ ले पराजित गरेका थिए ।
पेरिस ओलम्पिकमा नेपालबाट ७ खेलाडीले भाग लिएकोमा ३ खेलाडीको चुनौती पहिलो चरणमै समाप्त भएको छ । टेबलटेनिसका श्यान्टु श्रेष्ठ, सुटिङकी सुस्मिता नेपाल र पौडीकी डुवाना लामा पहिलो चरणबाटै बाहिरिएका छन् ।
आइतबार डुवाना र सुस्मिताले खराब प्रदर्शन गरे । ओलम्पिकको पौडीतर्फ नेपालकी डुवाना लामाले २ सय मिटर फ्रिस्टाइल विधाको पहिलो हिटमा सहभागी ७ खेलाडीमा अन्तिम स्थानमा रहिन् ।
उनले २ मिनेट २०.७४ सेकेण्डमा निर्धारित दुरी पार गर्दा आफ्नै व्यक्तिगत प्रदर्शनलाई पनि सुधार गर्न सकिनन् । यसअघि डुवानाले २ मिनेट १२.४६ सेकेन्डको प्रदर्शन थियो ।
यस्तै आज नै भएको सुटिङतर्फको १० मिटर एयर राइफलमा सुस्मिता नेपालको प्रदर्शन पनि निराशाजनक रह्यो। ४४ खेलाडी सहभागी सो विधामा सुमित्रा ४२ औँ स्थानमा रहिन्। सुस्मिताले ६ सय ७.८ स्कोर गरिन् ।
यसअघि शनिबार भएको टेवल टेनिसको खेलमा नेपालका स्यान्टु श्रेष्ठ प्रारम्भिक चरणबाट नै बाहिरिएका छन् । ब्याडमिन्टनका प्रिन्स दाहाल पनि समूह चरणको आफ्नो पहिलो खेलमा पराजित भएका थिए ।
मनिता र प्रिन्स बाहेक नेपालबाट अब पौडीका एलेकज्यान्डर शाह र एथ्लेटिक्सकी सन्तोषी श्रेष्ठले प्रतिस्पर्धा गर्न बाँकी छ ।
