१७ साउन ,काठमाण्डौ ।
अमेरिकाले ११ सेप्टेम्बर २००१ को आतंकवादी आक्रमणका मुख्य तीन योजनाकारसँग सम्झौता गरेको छ । मुख्य योजनाकार खालिद शेख मोहम्मद, वालिद मुहम्मद सलीह मुबारक बिन अताश र मुस्तफा अहमद आदम अल–औसावीसँग अमेरिकाले मृत्युदण्ड नदिने सम्झौता गरेको छ । उनीहरू २३ वर्षदेखि क्युबाको ग्वान्टानामोस्थित अमेरिकी नौसेनाको यातनापूर्ण हिरासतमा छन् ।
सन् २००१ मा न्यूयोर्कमा भएको अल कायदाको आक्रमणका उनीहरू योजनाकार रहेको अमेरिकी दाबी छ । उनीहरुलाई अमेरिकाले पाकिस्तानबाट गिरफ्तार गरेको हो ।उक्त आक्रमणमा न्यूयोर्क, भर्जिनिया र पेन्सिलभेनियामा लगभग ३ हजार मानिसको मृत्यु भएको थियो । त्यसपछि अमेरिकाले अफगानिस्तान र इराकमा आक्रमण गरेको थियो। यी तीन आरोपीले आक्रमणको आरोप स्वीकार नगर्दा अहिलेसम्म मुद्दा दर्ता भएको छैन ।
मृत्युदण्डको सजाय पाउने भएकाले उनीहरुले आरोप स्वीकार नगरेको बताउने गरिएको छ । त्यसैले अमेरिकी अभियोजनकर्ताहरुले आरोप स्वीकार गरे मृत्युदण्ड नदिने सम्झौता गरेको समाचारमा जनाइएको छ । यो विषयमा अमेरिकामा लामो समयदेखि चलेको बहसमा पीडित पक्षहरुले उनीहररूविरुद्ध मृत्युदण्ड हुनुपर्ने माग गर्दै आएका छन् ।
आरोप स्वीकार नगरी मृत्युदण्ड नहुने प्रावधानले मुद्दा नै दर्ता हुन नसकेको हो । घटनाका मुख्य योजनाकार मानिने ओसामा बिन लादेनको भने अमेरिकी आक्रमणमा मृत्यु भइसकेको छ । उनी पाकिस्तानमै मारिएका थिए ।यसैबीच हमासका राजनीतिक शाखा प्रमुख इस्माइल हानिया मारिएकोमा यसमा आफ्नो कुनै संलग्नता नरहेको भन्दै अमेरिकाले स्पष्टीकरण दिएको छ ।
अमेरिकी विदेशमन्त्री एन्टोनी ब्लिन्केनले बुधबार अमेरिकालाई इरानमा इस्माइल हानियाको हत्याका बारेमा ‘जानकारी नभएको र यसमा संलग्न नभएको’ बताएका हुन् ।’यसको के अर्थ हो म तपाईंलाई बताउन सक्तिन, म तपाईंलाई भन्न सक्छु कि युद्धविरामको अपरिहार्यता सबैका लागि रहेको महत्त्व राख्दछ’, आफ्ना स्टाफले साझा गरेको ट्रान्सक्रिप्टअनुसार सिङ्गापुर समाचार एसिया च्यानलसँगको अन्तरवार्तामा उनले भने ।
इरानका नवनिर्वाचित राष्ट्रपतिको शपथ ग्रहण समारोहमा सहभागी भएका हानिया इजरायली हवाई आक्रमणमा मारिएको हमासले बुधबार बताएको छ । इजरायली प्रधानमन्त्री बेन्यामिन नेतान्याहुले इजरायलमाथि अक्टोबर ७ को आक्रमणको प्रतिशोधमा हमासलाई समाप्त पार्ने वाचा गरेका छन् ।हमासको आक्रमणपछि युद्ध सुरु भएको हो ।
वासिङ्टन इजरायलको प्रमुख सैन्य समर्थक हो र उसले युद्धविरामका लागि जोड दिइरहेको छ । विदेशमन्त्री ब्लिन्केनले ‘हमासको गोलीबारीमा फँसेका’ इजरायली बन्धक र गाजाबासीका लािग लागि युद्धविराम ‘स्पष्टरूपमा हितमा रहेको’ बताएका छन् ।प्यालेस्टिनी आन्दोलन हमासका राजनीतिक प्रमुखका रूपमा हानियाले गाजामा युद्ध अन्त्य गर्न र इजरायलमा प्यालेस्टिनी कैदीहरूको बदलामा यस क्षेत्रमा राखिएका बन्धकहरूलाई रिहा गर्ने सम्झौताका लागि वार्ताको निरीक्षण गरिरहेका थिए ।
सिङ्गापुरको भ्रमणमा रहेका ब्लिन्केनले गाजा युद्धविराम द्वन्द्वलाई बाँकी क्षेत्रमा फैलिनबाट रोक्न महत्त्वपूर्ण रहेको बताए । ’हामी पहिलो दिनदेखि नै गाजामा राम्रो स्थानमा पुग्ने प्रयास मात्र नभई द्वन्द्वलाई फैलिनबाट रोक्न पनि काम गरिरहेका छौँ, चाहे त्यो लेबनान र हिजबुल्लाहसँग उत्तरमा होस वा हुथीहरूसँग लाल सागरमा होस् ।
इरान, सिरिया, इराक, तपाईं यसको नाम बताउनुहोस्’, उनले सिटी स्टेटमा एक फोरमलाई भने, ’यस्तो नहोस् र हामी राम्रो स्थानमा जान सक्छौँ भनेर सुनिश्चित गर्न प्रयास गर्ने एउटा ठूलो समाधान भनेको युद्धविराम पाउनु हो ।’युद्धविराम वार्तामा महत्त्वपूर्ण मध्यस्थकर्ता एवं हानियासहित हमासको राजनीतिक नेतृत्वलाई आतिथ्यता प्रदान गर्ने कतारले हत्यापछि वार्ताको भविष्यमाथि प्रश्न उठाएको छ । हमासले आफ्नो अनुभवी नेताको ‘कायरतापूर्ण’ हत्या ‘अनुत्तरित नहुने’ वाचा गरेको छ ।
