१८ साउन, विराटनगर ।
कोशी प्रदेशका मुख्यमन्त्री हिक्मतकुमार कार्कीले प्रदेश योजना बैङ्क मार्फत बजेटमा योजनाहरू समावेश गरेर अगाडि बढ्न सके बजेटमा देखिएको समस्याहरू निरूपण भएर जाने बताएका छन् । उनले योजना एक तिर बजेट अर्को तिर हुने परिपाटी भएकाले यसको अन्त्य गरिने बताए ।
उनले भने, हामीले योजना एकातिर र बजेट अर्को तिर हुने परिपाटी अन्त्य गर्न योजना बैक कसरी बनाउने र कसरी कार्यान्वयनमा लैजाने भन्ने छलफल गरिरहेका छौ । अगामी दिनमा त्यस्तो हुन दिँदैनौ ।
प्रदेश योजना आयोगद्वारा शुक्रवार विराटनगरमा आयोजित प्रदेशको समग्र आर्थिक विकास तथा लगानीको वातावरणमा सुधारका क्षेत्रमा अनुभव सिकाई आदान प्रदान कार्यक्रममा बोल्दै कार्कीले योजनालाई नागरिकको पक्षमा कार्यान्वयन गर्न आवश्यक रहेको बताएका हुन् ।
उनले योजनाहरु कार्यान्वयनमा प्रदेश सभा सदस्य, राजनैतिक नेतृत्व, विकासका साझेदारहरु र नागरिक समाजसँग आवश्यक छलफल गरी कार्यान्वयन गर्ने बताए । मुख्यमन्त्री कार्कीले प्रदेश स्थापना भएको अवधिमा प्रदेशमा विकासको पर्याप्त उपलब्धि हासिल गर्न सफल भए पनि यसको प्रचार गर्न नसक्दा प्रदेश प्रति वितृष्णा फैलाइएको बताए ।
उनले भने, अहिले ठुला दुई दल मिलेपछि प्रदेश संरचना चाहिँदैन भन्ने आवाज केही व्यक्तिहरूबाट आउन थालेको छ । यसले अराजकता निम्ताउन सक्छ । बरु हामीले यसलाई बलियो बनाउने तर्फ लाग्नु पर्छ । यस्ता आवाज निस्तेज गर्नु पर्छ ।
उनले प्रदेशमा विकासको गतिलाई तीव्रता दिन राष्ट्रिय पुँजीको विकास आवश्यक रहेको बताए।उनले भने‘ यसका लागि स्थानीय स्रोत,साधन र खनिज पदार्थको अधिकतम उपयोग र निर्यात गर्न आवश्यक छ । मुख्यमन्त्री कार्कीले मुलुकको व्यापार घाटा कम गर्न कृषि, पशुपालनको उत्पादन वृद्धि र जलविद्युतको निर्यात जरुरी रहेको विचार राखे।
भारतीयलाई ५ सय र हजारको नोट ल्याउन दिने पहल
मुख्यमन्त्री कार्कीले पर्यटक आवागमन वृद्धिका लागि पर्यटकीय क्षेत्रको विकासका लागि आवश्यक पूर्वाधारको विकास, सहज यातायात र व्यवस्थित वासस्थानमा व्यवस्था गरी दुई छिमेकी देशका नागरिकहरूलाई आकर्षण गर्नुपर्ने सुझाव दिएका छन् ।
उनले भारतीयहरूलाई नेपाल आगमनमा सहजता दिन भारतीय रुपैयाँ पाँच सय र दुई हजारको नोट एवं रु २५ हजार भन्दा बढी रकम ल्याउनका लागि पहल गरिरहेको जानकारी दिए । यसले प्रदेशको पर्यटन विकासमा महत्त्वपूर्ण भूमिका खेल्छ,उनले भने,‘ यसका लागि प्रदेश सरकारले पहल गर्छ ।
प्रदेश योजना आयोगका उपाध्यक्ष डा राजेन्द्र अधिकारीले प्रदेशका योजना व्यवस्थित गर्न काम गरिरहेको बताए। आयोगका पूर्व उपाध्यक्ष डा रघुराज काफ्ले ओमधरानन्द राजोपाध्याय र डा अजयचन्द्र लालले मुलुकको आर्थिक समृद्धि र नागरिकको रोजगार एवं आयआर्जनलाई ध्यानमा राखी विकासको कामलाई गतिदिनु पर्ने सुझाव दिए ।
सो अवसरमा राष्ट्रिय योजना आयोग पूर्व उपाध्यक्ष जगदीशचन्द्र पोखरेलले कार्यपत्र प्रस्तुत गर्दै योजना पहिचान गरी विकासको कार्यलाई निरन्तरता दिनु पर्ने सुझाव दिँदै प्रदेशमा व्यवासयिक क्षमता वृद्धि गर्नुपर्नेमा जोड दिए ।
