२८ साउन, विराटनगर । युरोपियन मुलुक फ्रान्सको राजधानी पेरिसमा हालै सम्पन्न ३३औँ गृष्मकालीन ओलम्पिकमा स्वर्ण पदक जितेका एक खेलाडीले पुरस्कारस्वरूप भैंसी पाउने भएका छन् ।
ओलम्पिकमा स्वर्ण पदक जितेका पाकिस्तानी खेलाडी २७ वर्षीय अरशद नदिमले आफ्नो ससुरालीबाट पुरस्कारस्वरूप भैंसी पाउने भएका हुन् ।
अरशदले ओलम्पिकमा एथलेटिक्सको पुरुष ज्याभलिन थ्रो स्पर्धामा भारतीय खेलाडी निरज चोपडालाई पछि पार्दै स्वर्ण जितेका थिए ।
पेरिस ओलम्पिकमा पाकिस्तानले जितेको यो एकमात्र पदक हो । त्यसबाहेक नदिम ओलम्पिकमा पाकिस्तानका लागि व्यक्तिगत रूपमा स्वर्ण पदक जित्ने पहिलो खेलाडी पनि बने ।
पछिल्लो ३२ वर्षपछि पाकिस्तानले पदक जितेको हो । यसअघि सन् १९९२ मा स्पेनको बार्सिलोनामा भएको ओलम्पिकमा पाकिस्तानले मेडल जितेको थियो ।
अरशदले गोल्ड जितेसँगै पाकिस्तानले ओलम्पिक पदकको संख्या चार पुर्याएको छ । उनले जितेको स्वर्ण पदककै कारण पनि पदक तालिकामा पाकिस्तानलाई भारतभन्दा पनि माथि उभ्याउन मद्दत पुर्यायो । भारतले पेरिस ओलम्पिकमा एक रजत र पाँच कांस्य पदक जितेको छ ।
‘गोल्ड मेडल’ सँगै अरशदले ५० हजार डलर पुरस्कार पनि पाए । विदेशमा नगद पुरस्कारबाट पुरस्कृत भएका अरशदलाई उनका ससुराले भैंसी पुरस्कार दिने भएका हुन् ।
अरशदका ससुरा मुहम्मद नवाजले सञ्चारमाध्यममार्फत् भैंसी पुरस्कार दिने घोषणा गरेको पाकिस्तानी मिडियाले जनाएका छन् ।
उनले भनेका छन्, ‘ओलम्पिकमा स्वर्ण पदक जिते पनि उनी आफ्नो माटोसँग जोडिएका व्यक्ति हुन् । त्यसैले मैले उनलाई भैँसी पुरस्कार दिने घोषणा गरेको हुँ ।’
खासमा अरशद नदिमको गाउँमा भैंसी पुरस्कार दिइनुलाई निकै सम्मानित रूपमा हेरिन्छ ।
अरशद नदिमको ससुराका चार छोरा र तीन छोरी छन् । त्यसमध्ये सबैभन्दा कान्छी छोरी आयशासँग अरशद नदिमले विवाह गरेका हुन् ।
