३० साउन ,काठमाण्डौ।
भुटानी शरणार्थी प्रकरणका अभियुक्त बेचन झाविरुद्ध पूरक अभियोग जिल्ला अदालत काठमाडौंमा दर्ता भएको छ । जिल्ला सरकारी वकिल कार्यालय काठमाडौंले झाविरुद्ध मंगलबार मुद्दा दायर गरेको हो । दोस्रो चरणको अनुसन्धान घेरामा परेका अन्य प्रतिवादीहरु भने पक्राउ परेका छैनन् । झाविरुद्ध सरकारी वकिलले ठगी, लिखत किर्ते, राज्यविरुद्ध र संगठित अपराधसम्बन्धी कसुर दाबीसहित मुद्दा दर्ता गरेको हो ।
जिल्ला अदालत काठमाडौंले बेचनको आज बयान गराउँदै छ । न्यायाधीश तीर्थराज केसीको इजलासमा उनको बयान गराइँदैछ । नेपालीलाई नक्कली भुटानी शरणार्थी बनाएर अमेरिका पठाउने भन्दै ठगेको आरोपमा सरकारी वकिलले झाबाट २८ करोड ८१ लाख ७४ हजार रकम असुल गर्नुपर्ने मागदाबी गरेको छ । मुलुकी अपराध संहिता–२०७४ को दफा २५४ बमोजिम प्रतिवादीबाट पीडितहरूलाई रकम भराउन मागदाबी लिइएको हो ।
झालाई एकीकृत कसुरमा पनि थप सजाय हुनुपर्ने मागदाबी छ । यसैबीच नेपालीलाई नक्कली भुटानी शरणार्थी बनाएर अमेरिका पठाउने कार्यमा संलग्न रहेको आरोपमा पक्राउ परेका झाले आफ्नो पोलिग्राफ परीक्षण गर्न नमानेको खुलेको छ । अनुसन्धानको क्रममा जिल्ला प्रहरी परिसर काठमाडौँका अधिकृतहरूले पोलिग्राफ गर्न खोजे पनि उनले अस्वीकार गरेका हुन् ।
प्रहरी प्रधान कार्यालयको पोलिग्राफ शाखामा कार्यरत प्रहरी वरिष्ठ नायव निरीक्षक अन्जु कँडेलले बेचनले ‘पोलिग्राफ परीक्षण गर्न नमानेको’ भन्ने ब्यहोराको प्रतिवेदन काठमाडौँ प्रहरीलाई दिएकी छन् । तर सार्वजनिक भएको अडियोका बारेमा भने आफ्नो स्वर परीक्षण गराउन उनी तयार भएका छन् । दुई करोडको चेक लिनको लागि भेट्दा उनले रामशरण केसीसँग मोबाइलमा कुरा गरेका थिए ।
त्यसबारे स्वर परीक्षण गर्न उनी सहमत भएका हुन् । स्वर परीक्षण गर्न अनुसन्धान अधिकृतहरूले पत्राचार गरेका छन् । बेचनले लिएको २ करोडको चेकको फोटोकपी अनुसन्धान अधिकृतहरूले मिसिलमा संलग्न गरेका छन् । झा अहिले जिल्ला प्रहरी परिसर काठमाडौँको हिरासतमा छन् । उनी असार १४ गते पक्राउ परेका थिए । हिरासतमा उनी श्रीमद भगवत् गीता पाठ गरेर बस्ने गरेको प्रहरी अधिकारीहरू बताउँछन् ।
उनलाई अरू थुनुवासँगै राखिएको छ । मन्त्रिपरिषद्बाट निर्णय गराउँछु भनेर उनले टोखा नगरपालिका–६ स्थित धापासी घर भएका रामशरण केसीसँग दुई करोडको चेक लिएको प्रहरीको अनुसन्धान निष्कर्ष छ । तर, बेचनले सो आरोप अस्वीकार गरेका छन् । बेचनको बयानबाट शरणार्थी प्रकरणमा उच्च राजनीतिक तहको कनेक्सन खुल्छ भन्ने आकलन थियो । तर, उनले शरणार्थी प्रकरणमा आफ्नो संलग्नता अस्वीकार गरेसँगै राजनीतिक कनेक्सन खुलेन ।
बयान लिएर प्रहरीले उनलाई थुनामा राखिरहेको छ । सङ्गठित अपराध मुद्दामा उनलाई ६० दिनसम्म हिरासतमा राख्न पाउने अधिकार प्रहरीसँग छ । शरणार्थी प्रकरणमा यसअघि पक्राउ परेर धरौटीमा छुटेका रामशरणले केसीले उनलाई चेक दिएको बयानमा खुलाएका छन् । चेक दिनेबलामा भेट्दा रामशरण र झाको बिचमा भएको कुराकानीको अडियो प्रहरीले बरामद गरेको छ ।
तर, बेचनले रामशरणसँग भेटेको कुरा पनि अस्वीकार गरेका छन् । यस्तै प्रहरीका अनुसार काठमाडौँ महानगरपालिका–१० बानेश्वर बस्ने झाले पर्साबाट नागरिकता लिएका छन् । तर, झाको साथमा भारतीय आधार कार्ड समेत भेटिएको छ । यसबारे सत्यतथ्य बुझ्न प्रहरीले भारतमा पत्राचार समेत गरिसकेको छ ।
झा पक्राउ परेपछि नै आफू नेतृत्वको सरकार ढलेको पूर्वप्रधानमन्त्री समेत रहेका माओवादी केन्द्रका अध्यक्षसहित पूर्व उपप्रधानमन्त्री रवि लामिछाने लगायतले आरोप लगाउँदै आएका छन् । शरणार्थी प्रकरणको निश्पक्ष छानविन गर्न नेपाली काग्रेसका महामन्त्री गगन थापाले पनि सरकार माथि दबाब बढाएका छन् । उनले हिजोको प्रतिनिधिसभाको बैठकमा मात्रै पनि भुटानी शरणार्थी प्रकरणमा सम्लग्न जो सुकै भएपनि कारबाहीको दायरामा ल्याउनु पर्ने बताएका थिए ।
