३० साउन, विराटनगर । पार्टीविरुद्ध नियोजित रूपमा सक्रिय बनेको भन्दै राष्ट्रिय स्वतन्त्र पार्टी (रास्वपा) ले मुकुल ढकाललाई स्पष्टीकरण सोधेको छ ।
केही समयअघि मात्र रास्वपाको महामन्त्री र प्रवक्ताबाट पदबाट मुक्त भएका ढकाललाई बुधबार पार्टीबाटै किन नहटाउने भन्दै स्पष्टीकरण सोधिएको हो ।
आज कार्यबाहक महामन्त्री कविन्द्र बुर्लाकोटीले ढकाललाई साधारण सदस्यबाट निष्कासन किन नगर्ने ? भनी २४ घण्टे स्पष्टीकरण सोधिएको हो ।
पत्रमा ढकाललाई आगामी २४ घन्टाभित्र स्पष्टीकरण पठाउन भनिएको छ । ढकाललाई स्पष्टीकरण सोधिएको पत्रमा लेखिएको छ, ‘पार्टीविरुद्ध नियोजित रूपमा निरन्तर सक्रिय तपाईंलाई पार्टीको साधारण सदस्यबाट किन निष्कासन नगर्ने ? तपाईंको साधारण सदस्यता किन खारेज नगर्ने ?’
आफूमाथि गरिएको कारवाही मनासिब नलागेमा पार्टी पुनरावेदन समितिमा पुनरावेदन गर्ने समय दिइएकोमा पुनरावेदन नगरी विभिन्न माध्यमहरूबाट पार्टी हितविपरीत गई विचार दिएको रास्वपाको ठहर छ ।
पार्टी सञ्चालन गर्न अक्षम, अनुशासनहीन, अराजनीतिक, अभद्र, अराजक व्यवहार गरी अनुशासन उल्लंघन गरेकोलगायतका आरोप लगाउँदै ढकाललाई महामन्त्री र प्रवक्ताको जिम्मेवारीबाट हटाइएको थियो ।
पार्टी सभापति रवि लामिछाने, उपसभापतिद्वय डिपी अर्याल र स्वर्णिम वाग्ले, प्रमुख सचेतक सन्तोष परियार, सहप्रवक्ता मनीष झालगायत महामन्त्री ढकाललाई कारबाही गर्न एकमत भएपछि ढकाल कारबाहीमा परेका हुन् ।
गत असार १९ बसेको केन्द्रीय समितिले उनलाई एक साताका लागि दुवै जिम्मेवारीबाट निलम्बन गरेको थियो ।
