३१ साउन, विराटनगर ।
राष्ट्रिय स्वतन्त्र पार्टीका निलम्बित महामन्त्री डा. मुकुल ढकालले पार्टीलाई स्पष्टीकरण बुझाएका छन् ।
बुधबार ढकाललाई रास्वपाले २४ घण्टे स्पष्टीकरण मागेपछि बिहीबार (आज) स्पष्टीकरण लेख्दै ढकालले पार्टी सभापति रवि लामिछानेको राजीनामा मागेका छन् ।
उनले स्पष्टीकरणमा लामिछानेमाथि सहकारी ठगी र दुई वटा पासपोर्ट प्रयोगबारे अनुसन्धान गर्नुपर्ने दोहोर्याउँदै लामिछानेले पार्टीमा विधि-विधानविपरीत, थीतिरहित हैकमे निरंकुश शासन चलाइरहेको दाबी गरेका हुन् ।
ढकालले नेपाली जनताले राखेको आशा, वैकल्पिक राजनीतिको बिउ लामिछानेका कारणले नाश हुँदै गएकाले राजीनामा दिनुपर्ने माग गरेका हुन् ।
पार्टी सञ्चालन गर्न अक्षम, अनुशासनहीन, अराजनीतिक, अभद्र, अराजक व्यवहार गरी अनुशासन उल्लंघन गरेकोलगायतका आरोप लगाउँदै ढकाललाई महामन्त्री र प्रवक्ताको जिम्मेवारीबाट हटाइएको थियो ।
गत असार १९ बसेको केन्द्रीय समितिले उनलाई एक साताका लागि दुवै जिम्मेवारीबाट निलम्बन गरेको थियो ।
पार्टी सभापति रवि लामिछाने, उपसभापतिद्वय डिपी अर्याल र स्वर्णिम वाग्ले, प्रमुख सचेतक सन्तोष परियार, सहप्रवक्ता मनीष झालगायत महामन्त्री ढकाललाई कारबाही गर्न एकमत भएपछि ढकाल कारबाहीमा परेका हुन् ।
