साउन ३१ ,एजेन्सी ।
अन्तर्राष्ट्रिय क्रिकेट संघ(आईसीसी) र भारतीय क्रिकेट कन्ट्रोल बोर्ड(बीसीसीआई)बीच टकराव देखिएको छ । आईसीसीले महिला टी–२० विश्वकप आयोजना गर्ने बीसीसीआईलाई प्रस्ताव गरेको थियो । जसलाई बीसीसीआईले अस्वीकार गरेको छ । आईसीसीले अब अगस्ट २० मा आयोजना गर्ने अन्तिम निर्णय लिनुपर्नेछ ।
अक्टोबर ३ देखि २० सम्म आयोजना हुने प्रतियोगिताको आयोजकत्वबाट पछि हटेपछि श्रीलंका र युएई दुई विकल्प बचेका छन् । बीसीसीआई सचिव जय शाहले टाइम्स अफ इन्डियासँगको कुराकानीमा भनेका छन् , ‘उनीहरूले अर्थात आईसीसीले हामीलाई विश्वकप आयोजना गर्ने प्रस्ताव राखेका थिए । तर मैले स्पष्ट रूपमा अस्वीकार गरेँ, यो हाम्रो देशमा वर्षाको मौसम हो । त्यो भन्दा महत्त्वपूर्ण विषय भनेको हामीले अर्को वर्ष महिला विश्वकप आयोजना गर्दैछौं । हामी कसैलाई पनि भारतले लगातार दुई विश्वकप आयोजना गर्न चाहेको भन्ने सन्देश दिन चाहँदैनौं।’
बंगलादेश अहिले सरकार विरोधी आन्दोलनका कारण हिंसा र सुरक्षा चुनौतीसँग जुधिरहेको छ । त्यही कारणले बंगलादेशको ठाउँमा आईसीसीले अन्य देशलाई प्रतियोगिता आयोजना गर्न दिन चाहिरहेको छ । आईसीसीका एक अधिकारीले यस हप्ताको सुरुमा बंगलादेशको अवस्थाको अनुगमन भइरहेको र सबै विकल्प खुला राखिएको बताएका थिए ।
आईसीसीको विज्ञप्तिमा भनिएको छ, ‘हामी बंगलादेश क्रिकेट बोर्ड (बीसीबी), उनीहरूको सुरक्षा एजेन्सीहरू र हाम्रा आफ्नै सुरक्षा सल्लाहकारहरूसँगको समन्वयमा त्यहाँ भइरहेको घटनाक्रमलाई नजिकबाट निगरानी गरिरहेका छौँ । हाम्रो प्राथमिकता सबै सहभागीहरूको सुरक्षा हो र यो राम्रो छ।’
बंगलादेशको नयाँ अन्तरिम सरकारले टूर्नामेन्ट हातबाट उम्कन नदिन अन्तिम प्रयास गरिरहेको बेला, इङ्ल्यान्ड, अष्ट्रेलिया र भारतलगायत धेरै सहभागी टोलीहरूको सरकारले जारी गरेको ट्राभल एडभाइजरी बीसीबीका लागि सबैभन्दा ठूलो बाधा बनेको छ । सुरक्षा चुनौतीबाहेक बीसीबी पनि समस्यामा छ ।
उनका अध्यक्ष तथा पूर्व खेलकुद मन्त्री नजमुल हसन ५ अगस्टमा अवामी लिग सरकारको पतनपछि प्रभावकारी रूपमा पदबाट बाहिर छन् । राजनीतिक सम्बन्ध भएका धेरै बोर्ड सञ्चालक पनि सम्पर्कमा छैनन् । यस्तो अवस्थामा विश्वकप कसरी आयोजना हुन्छ भन्ने अन्यौलता उत्पन्न भएको छ । बंगलादेशको अन्तरिम सरकारले भने यसका विषयमा अहिलेसम्म बोलेको छैन् ।
