३२ साउन, विराटनगर । युरोपको दोस्रो ठुलो फुटबल प्रतियोगिता युरोपा लिगको छनोट खेलअन्तर्गत बिहीबार राति एउटा ऐतिहासिक खेल भएको छ ।
युरोपा लिगअन्तर्गत छनोट चरणको प्लेअफका लागि भएको खेलको नतिजाका लागि ३४ जना खेलाडीले पेनाल्टी प्रहार गर्नुपरेको छ । यति धेरै पेनाल्टी प्रहार भएको युइएफएअन्तर्गतका फुटबल कुनै पनि प्रतियोगिताकै इतिहासमा पहिलोपटक हाे ।
यसअघि सन् २००७ मा भएको युइएफए युरोपियन यु-२१ च्याम्पियनसिपमा धेरैपटक पेनाल्टी प्रहार भएको थियो । त्यसबेला इंग्ल्यान्ड यु-२१ र नेदरल्यान्ड्सबीचको खेलमा कुल ३२ पटक पेनाल्टी हानिएका थिए ।
गएराति डच टिम आयाक्स एम्सटरड्याम र पानाथिनाइकोसबीचको खेलले उक्त कीर्तिमान भंग गर्दै नयाँ इतिहास रचेको हो ।
युरोपा लिगको तेस्रो चरणको छनोट खेलको निर्धारित समयसम्मा पानाथिनाइकोसले १-० ले खेल जितेको थियो । तर, उसले अघिल्लो लेगमा १-० गोलले हारेका कारण समग्रमा १-१ को नतिजा भएपछि थप समय खेलाइएको थियो ।
अतिरिक्त समयमा दुवैले गोल गर्न नसकेपछि खेल पेनाल्टी सुटआउटमा धकेलिएको थियो, जसमा दुवै टिमका समान १७ खेलाडीले प्रहार गरेका थिए ।
पेनाल्टीमा आयाक्सका १३ र पानाथिनाइकोसका १२ खेलाडीले गोल गरेसँगै डच टिम प्लेअफमा पुग्यो । बिहीबार आयाक्सलाई जित दिलाउन गोलकिपर रेम्को पास्भिर नायक बने । उनले पाँचवटा पेनाल्टी बचाउँदै आफ्नो प्रहारलाई गोलमा पनि परिणत गरेका थिए ।
पेनाल्टीकै कुरा गर्दा विश्व फुटबलमा सबैभन्दा लामो पेनाल्टी सुटआउटको कीर्तिमान इजरायली तेस्रो श्रेणीको लिगले बनाएको थियो । डिमोना र सिम्सोनबीच भएको उक्त खेलमा नतिजाको निर्णयका लागि कुल ५६ पेनाल्टी प्रहार भएका थिए ।
