३२ साउन, विराटनगर ।
कुनै बेला ब्राजिलियन नेयमार, फ्रान्सका किलियन एम्बाप्पे, अर्जेन्टिनाका लियोनल मेस्सी, स्पेनका सर्जियो रामोसलगायत खेलाडीलाई एकसाथ मैदान उतार्ने सामर्थ्य राख्थ्यो, पिएसजी । ‘ड्रिम प्रोजेक्ट’ भन्दै कतारको लगानीबाट सञ्चालित फ्रान्सेली क्लब पिएसजीका मालिक नासर अल खिलाइफीले युरोपियन शीर्ष पाँच लिग खेल्ने स्टार खेलाडी थुपारेका थिए ।
सुरुमा रियल मड्रिडबाट रामोसलाई ल्याएर डिफेन्सको पार्ट बलियो बनाएका उनले त्यसपछि मेस्सीलाई बार्सिलोनाबाट अनुबन्ध गरेका थिए । पिएसजीसँगै रहेका एम्बाप्पे, नेयमार र एन्जल डिमारियालाई पनि उच्च पारिश्रमिकका साथ क्लबमा थिए ।
मैदानमा त्यसबेला स्टार खेलाडीले भरिपूर्ण हुन्थ्यो पिएसजी । फरवार्ड लाइनमा मेस्सी, नेयमार र एम्बाप्पे अथवा डी मारिया अनि डिफेन्सिङ लाइनमा रामोस, अच्राफ हाकिमीलगायत । तर, विस्तारै पिएसजी स्टार खेलाडीविहीन बन्दै गइरहेको छ ।
सर्वाधिक धेरै २५६ गोल गरेका एम्बाप्पेको बहिर्गमनपछि त झन् पेरिस सेन्ट जर्मेन (पिएसजी) मा ठुलो शून्यताको अवस्था नै ल्याएको छ । विश्वकप विजेता एम्बाप्पे स्पेनिस क्लब रियल मड्रिड पुगेपछि पिएसजीको एउटा युगको अन्त्य भएको हो कि भन्ने अनुमान लगाउन गाह्रो छैन ।
त्यसअघि पिएसजीमा धेरै गोल गर्ने खेलाडीमध्येका एक नेयमारले पनि फ्रान्स छोडे । पिएसजीबाट ११८ गोल गरेका नेयमार साउदी अरबियन क्लब अल हिलालतिर लागे । नेयमार बाहिरिनुभन्दा एक महिनाअघि मेस्सी अमेरिकन सकर लिग खेल्ने इन्टर मियामीमा अनुबन्ध भए ।
अहिले कोही पनि नभएपछि पिएसजी बार्सिलोनाबाट फ्रान्स पुगेका ओसमान डेम्बेलेको भरमा नयाँ सिजनको थालनी गर्ने तरखरमा छ । गोन्कालो रामोस, माउरो इकार्डीलाई फरवार्ड लाइन सुम्पिएर गोलरक्षकको जिम्मेवारी केयलेर नाभासको भरोसामा छ ।
स्टार खेलाडीजति सबै कता–कता हानिएपछि पिएसजीको ‘सान’ त ढल्यो नै फ्रेन्च लिगकै रोमाञ्चकता खस्किने अनुमान छ । साबिक विजेता पिएसजीले शुक्रबार (आज) राति लि हाभ्रेसँग खेल्दै नयाँ सिजनको फ्रेन्च लिगको थालनी गर्दै छ ।
पछिल्ला १२ सिजनमा १० लिग उपाधिका साथ फ्रान्सेली फुटबलमा प्रभुत्व जमाएको पिएसजीले यो सिजन उपाधि रक्षा गर्न चुनौती छ । मुख्य प्रशिक्षक लुइस एनरिकमाथि टोलीलाई नयाँ आकार दिन र फ्रान्समा आफ्नो प्रभुत्व कायम राख्न दबाब बढेको छ ।
