३ भदौ , एजेन्सी ।
दक्षिण चीन सागरमा एक पटक फेरि तनाव बढेको छ । आज विहान सो क्षेत्रमा चिनियाँ जहाजलाई फिलिपिन्सको एक जहाजले ठक्कर दिएको छ । चिनियाँ तटरक्षक बलले फिलिपिन्सको जहाजले चिनियाँ चेतावनीको बावजुद आफ्नो जहाजलाई धक्का दिएको दाबी गरेको छ । यो ठक्कर फिलिपिन्सले जानीजानी दिएको पनि चिनियाँ पक्षको आरोप छ ।
साथै फिलिपिन्सले आफ्नो जलक्षेत्रमा घुसपैठ गरेको पनि चीनले आरोप लगाएको छ । चिनियाँ तटरक्षक बलले यसको भिडियो पनि सामाजिक संजादलमा सार्वजनिक गरेको छ । भिडियोमा सोमबार विहान दक्षिण चीन सागरमा दुई जहाजहरु आपसमा ठोक्किएको देखिएको छ । यसमा चिनियाँ जहाजलाई तटरक्षक बलको जहाज भएको बताइएको छ ।
चीनको समुद्री सुरक्षा बलले भनेको छ कि फिलिपिन्सको जहाजलाई सबीना जल क्षेत्रमा प्रवेश निषेध गरिएको छ । तर त्यसको बावजुद पनि उसको जहाज सेकेन्ड थमस शोल जलक्षेत्रमा प्रवेश गरेको चिनियाँ पक्षले आरोप लगाएको छ । चिनियाँ तटरक्षक बलका प्रवक्ता गान यूले भनेका छन्, २ फिलिपिनी तटरक्षक जहाजहरुले बिना अनुमति चीनको जलक्षेत्रमा अवैध घुसपैठ गरेका छन् ।
उनले भने, फिलिपिन्सले पटक पटक दुई देशको बीचमा बनाइएको अस्थायी व्यवस्थाको उल्लंघन गरिरहेको छ । चिनियाँ पक्षबाट भनिएको छ, घटनापछि कानून अनुसार फिलिन्सिका जहाजहरुविरुद्ध नियंत्रणका लागि उपाय गरियो र फिलिपिन्सलाई उल्लंघन रोक्नका लागि र परिणाम भोग्नका लागि पनि चेतावनी दिइएको छ । केही दिनअघि मात्रै चीन र फिलिपिन्सबीच एक सम्झौता भएको छ ।
जसले दक्षिण चीन सागरमा एक द्वीपको सबैभन्दा विवादित क्षेत्र ’सेकेण्ड थमस शोल’ मा टकराब अन्त्य हुने आशा गरिएको थियो । ’सेकेण्ड थमस शोल’ फिलिपिन्सको कब्जामा छ तर चीनले पनि यसमा दाबी गर्दै आएको छ । फिलिपिन्स र चीनबीच भएको सम्झौताको उद्देश्य कुनै पनि पक्षको क्षेत्रीय दाबीलाई स्वीकार नगरिकनै यस्तो व्यवस्था बनाउनु हो, जुन दुवै पक्षका लागि स्वीकार्य हुनेछ ।
चीनले दक्षिण चीन सागरको अधिकांश क्षेत्रमा आफ्नो अधिकार रहेको दाबी गर्दै आएको छ । तर उसंग यो दाबीका लागि कुनै पनि कानूनी आधार भने छैन । हेग स्थित स्थायी मध्यस्थता न्यायालयले २०१६ मा एक निर्णय गरेको थियो, जसमा स्पष्ट गरिएको छ कि यो क्षेत्रमा चीनका दाबीमा कुनै कानूनी आधार छैन । यो निर्णय संयुक्त राष्ट्र समुद्री कानून सम्मेलन (यूएनसीएलओएस)मा आधारित थियो । यद्यपी, चीनले यसलाई अस्वीकार गरेको छ ।
