३ भदौ , एजेन्सी ।
ला लिगा सिजनको पहिलो खेलमा आफ्नो टोलीले खराब प्रदर्शन गरेपछि रियल मड्रिडका प्रशिक्षक कार्लो एन्सेलोट्टी फायर भएका छन् । उनले मालोर्कासँग १–१ गोलको बराबरी खेल्दा आफ्नो टोलीको सन्तुलन र खराब डिफेन्डिङको आलोचना गरेका छन् । १३ औं मिनेटमा रोड्रिगोले गोल गर्दै रियललाई सुरुआती अग्रता दिलाएका थिए ।
तर, ५३ औं मिनेटमा वेदात मुरिकीले गोल गर्दै मालोर्कालाई खेलमा फर्काए । ‘आज म खुसी छैन । मलाई लाग्छ हामीले अझ राम्रो गर्न सक्थ्यौं,’ निराश एन्सेलोट्टीले खेलपछि भने, ‘हामी अधिक एकाग्र हुन र एक समूहको रूपमा खेल्न आवश्यक छ । यो फिटनेसको समस्या होइन, मानसिक समस्या हो।’ एन्सेलोट्टीले आफ्नो टोलीको डिफेन्डरको विशेष आलोचना गर्दै थप अनुशासित प्रदर्शनको खाँचो रहेको बताए ।
उनले रियलले आफ्नै गल्तीका कारण सजिलै हार बेहोर्न सक्ने भन्दै आफ्ना खेलाडीलाई शनिबारको गल्तीबाट छिटो सिक्न आग्रह गरे । ‘अग्रता लिँदै खेलमा राम्रो सुरुआत गरेका थियौं। तर, त्यसपछि दोस्रो गोल गर्ने मौका गुमायौं। हामीले दोस्रो हाफमा सन्तुलन मिलाउन सकेनौं। त्यसैले हार्न पुग्यौं। यो राम्रो खेल थिएन । हामीले अझ राम्रो प्रतिरक्षा गर्न आवश्यक छ । हामी धेरै आक्रामक टोली हौं, तर रक्षात्मक सन्तुलन हुन जरुरी हुन्छ,’ उनले भनेका छन् ।
मिडविकमा डेब्यु गरेका स्टार स्ट्राइकर किलियन एमबाप्पेको यो रियलका लागि दोस्रो खेल थियो । ला लिगामा भने यो उनको डेब्यु खेल हो । तर, उनको डेब्यु राम्रो हुन सकेन । युइएफए सुपर कपअन्तर्गत बुधबार राति भएको खेलमा रियलले एटलान्टालाई २–० ले पराजित गर्दा उनले एक गोल गरेका थिए । रियलका प्रशिक्षक कार्लो एन्सेलोट्टीले एटलान्टाविरुद्ध रोड्रिगो, भिनिसियस जुनियर र एमबाप्पलाई अट्याकिङ लाइनमा उतारेका थिए ।
उता नयाँ सिजनको इंग्लिस प्रिमियर लिग फुटबलअन्तर्गत आइतबार राति भएको म्यानचेस्टर सिटी र चेल्सीबीचको खेल विवादमा परेको छ । चेल्सीको मैदान स्टाम्फोर्ड ब्रिजमा भएको खेलमा डिफेन्डिङ च्याम्पियन सिटीले २–१ गोलको जित निकाल्दै सुखद सुरुआत गरेको थियो । स्ट्यामफोर्ड ब्रिजमा सिटीलाई जिताउन इएर्लिङ हालान्ड र माटेओ कोभासिचले एक–एक गोल गरे ।
खेलको १८औं मिनेटमा बर्नार्डो सिल्भाको पासमा हालान्डले गोल गर्दै सिटीलाई पहिलो हाफभरि अग्रता दिलाए । खेलको ८४औं मिनेटमा कोभासिसले गोल गरेपछि सिटी २–० गोलले विजयी भएको हो । त्यसअघि खेलको ७६औं मिनेटमा पेनाल्टी क्षेत्रभित्र कोभासिचको ह्यान्डबल भएको भन्दै चेल्सी समर्थकहरूले विवाद सुरु गरेका हुन् । कोभासिच पेनाल्टी क्षेत्रमा बलका लागि प्रतिस्पर्धा गरिरहँदा गुस्तोले बल प्रहार गरेका थिए । बल कोभासिचको कुहिनोमा लाग्यो ।
नजिकै रहेका रेफ्री एन्थोनी टेलरले पेनाल्टी दिएनन् । र, पछि भिएआरले यो निर्णयलाई समर्थन ग¥यो । भिएआरले रेफ्री एन्थोनी टेलरको निर्णयलाई पुष्टि ग¥यो किनभने कोभासिच धेरै नजिकको दूरीमा थिए र दण्डित हुन सक्ने अवस्थामा थिएनन् । तर, बलले कोभासिचको कुहिनोमा लागेको भन्दै चेल्सीका खेलाडीले पेनाल्टीको अपिल गरेका थिए । चौतर्फी विवाद भएपछि इंग्लिस प्रिमियर लिगले समेत पेनाल्टी नभएको आधिकारिक धारणा प्रकट गरेको छ ।
