४ भदौ ,एजेन्सी ।
जर्मनीका मिडफिल्डर इल्के गुन्डोगानले अन्तर्राष्ट्रिय फुटबलबाट सन्न्यास लिएका छन् । गत वर्ष म्यानचेस्टर सिटीबाट बार्सिलोनामा प्रवेश गरेका गुन्डोगानले सन् २०११ मा जर्मनीका लागि डेब्यु गरेका थिए । त्यसता राष्ट्रिय टोलीबाट ८२ खेल खेलेका उनले १९ गोल गरे । गुन्डोगानले सामाजिक सञ्जालमा लेखेका छन्, ‘केही हप्ताको विचारपछि अब मेरो राष्ट्रिय टोलीको करियर अन्त्य गर्ने समय आएको छ भन्ने निष्कर्षमा पुगेको छु।’
गुन्डोगानले युरो कप २०२४ मा जर्मनीका लागि सबै पाँच खेल खेलेका थिए । उनको अन्तिम अन्तर्राष्ट्रिय खेल विजेता स्पेनसँग क्वार्टरफाइनलमा पराजित हुनु थियो । यता स्विट्जरल्यान्डका नम्बर वान गोलरक्षक यान सोमरले एक दशकको लामो अन्तर्राष्ट्रिय फुटबलबाट सन्न्यास लिएका छन् । यानले सोमबार ३५ वर्षको उमेरमा सन्न्यास लिएका हुन् । यानको सन्न्याससँगै बोरुसिया डर्टमुन्डका ग्रेगर कोबेलले पहिलो रोजाइ पोस्ट सम्हाल्नेछन् ।
सन् २०१२ मा स्विट्जरल्यान्डको टोलीमा डेब्यू गरेका यानले तीन विश्वकप र तीन युरो कप खेलेका थिए । गत महिना जर्मनीमा भएको युरो कप २०२४ को क्वार्टरफाइनलमा इङ्ल्यान्डसँग १–१ गोलको बराबरी खेलेपछि उनले ९४ खेलमध्ये अन्तिम खेल पेनाल्टी सुटआउटमा गुमाए । युरो कप २०२० को अन्तिम १६ को खेलमा फ्रान्सलाई ३–३ गोलको बराबरीमा रोकेपछि किलियन एमबाप्पेको पेनाल्टीलाई बचाएर योनले उत्कृष्ट प्रदर्शन गरेका थिए ।
उनले इटालीमा आफ्नो पहिलो सिजनमा इन्टर मिलानलाई सिरी ‘ए’ जिताउन महत्त्वपूर्ण भूमिका खेलेका थिए। बायर्न म्युनिखसँग जर्मनीमा र बासेलसँग स्विट्जरल्यान्डमा चार पटक लिग उपाधि पनि उनले जिते । २६ वर्षीय कोबेलले स्विट्जरल्यान्डका लागि पाँच पटक खेलेका छन् । सन् २०२२ को विश्वकपमा सर्बियामाथि ३–२ को जित हात पार्दा उनले पोस्ट सम्हालेका थिए ।
स्विट्जरल्यान्डले आगामी सेप्टेम्बर ५ र ८ मा डेनमार्क र युरो कप २०२४ को विजेता स्पेनसँग खेल्नेछ । यसैबीच पेरिस ओलम्पिक २०२४ मा आयोजक राष्ट्रलाई रजत पदक दिलाएका प्रशिक्षक थिएरी हेनरीले पनि राजीनामा दिएका छन् । फ्रान्सेली फुटबल महासंघले व्यक्तिगत कारण देखाउँदै उनले पदबाट राजीनामा दिएको जानकारी दिएको छ ।
पेरिस ओलम्पिकलाई ध्यानमा राखेर हेनरीलाई एक वर्षअघि अनुबन्ध गरिएको थियो । उनले टोलीलाई फाइनलमा पु¥याएका थिए । तर, पार्क डेस प्रिन्सेसमा अतिरिक्त समयमा स्पेनसँग ५–३ ले पराजित हुनपुग्यो । फाइनलपछि आर्सनल र बार्सिलोना पूर्वफरवार्डले टोलीसँग रहन नसक्ने बताएका थिए । ओलम्पिमा आफ्नो देशको लागि रजत पदक जित्नु आफ्नो जीवनको सबैभन्दा ठूलो उपलब्धी रहेको उनले बताए ।
