५ भदौ, विराटनगर ।
राष्ट्रिय स्वतन्त्र पार्टी (रास्वपा) ले निलम्बित महामन्त्री डा. मुकुल ढकाललाई अन्तिम पटक स्पष्टीकरण सोध्ने भएको छ । बुधबार पार्टी कार्यालय चःमतिमा बसेको केन्द्रीय समिति बैठकले ढकाललाई अन्तिम पटक स्पष्टीकरण सोध्ने निर्णय गरेको हो ।
ढकाल निलम्बनमा परेपछि कार्यवाहक प्रवक्ताको जिम्मेवारी पाएका मनिष झाले अन्तिम एक पटक उनलाई स्पष्टीकरण सोध्ने निर्णय भएको सुनाए । पार्टीविरुद्ध नियोजित रूपमा सक्रिय बनेको भन्दै रास्वपाले यसअघि नै ढकाललाई स्पष्टीकरण सोधिसकेको थियो ।
गत साउन ३० गते सचिवालयले सोधेको स्पष्टीकरणको जवाफ ढकालले दिइसकेका छन् ।
पार्टी सञ्चालन गर्न अक्षम, अनुशासनहीन, अराजनीतिक, अभद्र, अराजक व्यवहार गरी अनुशासन उल्लंघन गरेकोलगायतका आरोप लगाउँदै ढकाललाई महामन्त्री र प्रवक्ताको जिम्मेवारीबाट हटाइएको थियो । गत असार १९ बसेको केन्द्रीय समितिले उनलाई एक साताका लागि दुवै जिम्मेवारीबाट निलम्बन गरेको थियो ।
