५ भदौ ,काठमाण्डौ ।
त्रिभुवन विश्वविद्यालय निकै नै असुरक्षित भएको भन्दै शिक्षा, विज्ञान तथा प्रविधि मन्त्री विद्या भट्टराईले चिन्ता ब्यक्त गर्दै सार्वजनिक रुपमा सामाजिक संजालबाट गृहमन्त्रीसँग सुरक्षा मागेगरेपछि पूर्व शिक्षा मन्त्री सुमना श्रेष्ठले कडा जवाफ दिएकी छन् ।
सामाजिक संजालबाटै पूर्वमन्त्री सुमनाले त्रिविमा भएको बेथिती राजनीतिक संरक्षण र आरक्षणलेब बढेको भन्दै त्रिवि बचाउन अबजनताले राजनैतिक प्रशय पाएका गुण्डासँग भिड्न आउनुपर्ने हो? भन्दै प्रश्न समेत सोधेकी छन् । उनले मन्त्री विद्याप्रति लक्षित गर्दै समस्या समाधान नगर्ने हो भने बाटो छाड्न तयार हुनु पर्ने संकेत गरेकी छन् ।
उनले भनेकी छन्, वास्तवमा, काम गर्यो भने सकिन्छ। उदाहरण थुप्रै छन्। अहिलेको दुई तिहाईको सरकारका मन्त्रीलाई किन यस्तो आनाकानी? समस्या समाधान गर्नु छैन भन्ने बुझ्नु पर्ने हो? त्रिविमा पनि दुई तिहाई सरकार छ – एउटा विद्यार्थी सङ्घ र अर्को प्राध्यापक सङ्घ। अनि सबै सङ्घले पाएको छ संघीय सरकारका दुई तिहाईको बहुमतले सरकार बनाएका ठुला दलका आशीर्वाद। त्रविमा पदाधिकारीले असुरक्षा महसुस गरेको, सरस्वती क्याम्पसमा अध्यापकमाथि भएको कुटपिट, समाजशास्त्री प्राध्यापक प्रेम चलाउने माथि घातक प्रहार गर्ने, राजनैतिक फाइदाका लागि विश्वविद्यालयलाई खाने भाँडो, कार्यकर्ता पाल्ने भाँडो – सबै गर्ने औजार हो राजनैतिक भातृ संगठन!
सुमनाले थप प्रश्न गरेकी छन्, दुई तिहाईको सरकारले के दियो? स्थायीत्व कता गयो? गुण्डाहरुको मनोबल किन बढेको? विधिको शासन कता गयो? कसको आडमा? कसको प्रशयमा? अनि शिक्षा, विज्ञान तथा प्रविधि मन्त्रीको सुरक्षाको माग छ, जनतासँग – बहस चलोस् भनेर रे। शिक्षा, विज्ञान तथा प्रविधि मन्त्रीले सुरक्षा व्यवस्था सहित उच्च मनोवलका साथ पदाधिकारीहरुलाई काम गर्ने वातावरण बनाउने कि जनता गुहार्ने? दशकौंदेखि आफै विश्वविद्यालयमा चरम राजनीतिकरण गर्ने, अपराधिक राजनीतिको सम्रक्षण गर्ने अनि जनता गुहार्ने? अब के जनताले राजनैतिक प्रशय पाएका गुण्डासँग भिड्न आउनुपर्ने हो?
उनले यसै विषयमा शिक्षा, स्वास्थ्य तथा सूचना प्रविधि समितिका सभापतिलाई आकस्मिक बैठक बोलाउन अनुरोध गरेको समेत बताएकी छन् । सुमनाले अन्त्यमा भनेकी छन्, दलीय राजनीतिमुक्त शिक्षा क्षेत्र बनाउनुहोस्। देशले यो भन्दा बढी कति गुमाउन पर्ने हो? अझै कति पुस्ताले यो हविगत बेहोर्नु पर्ने हो? No …if, no …but दलगत दलीय राजनीति शिक्षा क्षेत्रबाट CUT
यसअघि शिक्षामन्त्री विद्या भट्टराईले त्रिभुवन विश्वविद्यालय निकै नै असुरक्षित भएको भन्दै सरकारसंग सुरक्षा प्रबन्धको मागसमेत गरेकी थिइन । केही दिनदेखि विश्वविद्यालयका पदाधिकारीहरूमाथि हमलाको प्रयास र प्राध्यापकहरूलाई धम्की आएको भन्दै शिक्षामन्त्री भट्टराईले गृहमन्त्रीसँग सुरक्षाको माग गरेकी हुन् ।
उनले सामाजिक सन्जाल फेसबुकमा स्टाटस लेख्दै गृहमन्त्रीलाई सुरक्षा प्रबन्ध मिलाइदिन माग गरेकी हुन् । ‘त्रिभुवन विश्वविद्यालयमा केही दिनदेखि पदाधिकारीहरुमाथि हमला गर्न खोज्नु र प्राध्यापकहरुलाई फोन गर्दै धम्की दिने गरेको कारण सिङ्गो विश्वविद्यालय असुरक्षित बनेको छ’ मन्त्री भट्टराईले लेखेकी छन्, ‘त्रिभुवन विश्वविद्यालयमा सुरक्षाका लागि व्यवस्थित प्रबन्ध गर्न म गृहमन्त्रीसँग जोडदार माग गर्दछु ।’
गुण्डागर्दी गर्ने छुट कसैलाई नभएको भन्दै उनले यस्तो क्रियाकलापमा संलग्न व्यक्तिहरुलाई कानुनी दायरामा ल्याई कारबाही गर्न समेत उनले गृह मन्त्रालयलाई अनुरोध गरेकी छन् ।
