६ भदौ, विराटनगर ।
सत्तारूढ दल नेपाली कांग्रेसका सभापति शेरबहादुर देउवाले महामन्त्रीद्वय गगनकुमार थापा र विश्वप्रकाश शर्माले पेस गरेको प्रतिवेदन परिमार्जनका लागि कसरत गरिरहेका छन् ।
महामन्त्रीद्वय थापा र शर्माले साउन अन्तिम साता बसेको केन्द्रीय समितिको बैठकमा आ-आफ्नो प्रतिवेदन प्रस्तुत गरेका थिए । उक्त प्रतिवेदनमा विवाद भएपछि साउन २३ देखि २८ गतेसम्म बसेर केन्द्रीय समिति बैठक स्थगन भएको थियो ।
सोही प्रतिवेदनउपर पदाधिकारीहरूसँग छलफल गर्ने तयारी, सभापति देउवाको छ । देउवासहित संस्थापन पक्ष महामन्त्रीद्वयको प्रतिवेदन परिमार्जन गर्नुपर्ने अडानमा छ ।
चुनावी गठबन्धन रणनीतिक भएको र एक्जिट पोलिसि विधानमा समावेश गर्न नहुने जिकिर संस्थापन पक्षको छ । सोही विवादका कारण केन्द्रीय समितिले निर्णय गर्न नसकी बैठक भदौ ७ गते सम्मलाई स्थगन भएको हो ।
प्रतिवेदनमा परिमार्जन गराउने उद्देश्यसहित देउवाले पदाधिकारीमा छलफल गर्न लागेको उनका स्वकीय सचिव भानु देउवाले जानकारी दिएका छन् । उनका अनुसार छलफलको समय भने छिनोफानो भएको छैन । आजै वा भोलि बैठक बस्नुअघि पनि छलफल हुन सक्न बताइएको छ ।
कांग्रेसले बिहीबार बिहान ११ बजेका लागि केन्द्रीय समिति बैठक बोलाएको छ । तथापि, अहिलेसम्म सहमति जुट्न सकेको छैन ।
के थियो, महामन्त्रीद्वयको प्रतिवेदनमा ?
२०८० फागुनमा ललितपुरको गोदावरीमा सम्पन्न महासमिति बैठकले राय सहितको प्रतिवेदन पास गर्ने जिम्मा केन्द्रीय समितिलाई दिएको थियो । सोही कारण साउन २३ देखि २८ सम्म बसेको केन्द्रीय समिति बैठकमा महामन्त्रीद्वयको प्रस्ताव प्रस्तुत भएको हो ।
महामन्त्री थापाले चुनावी गठबन्धन गर्न नहुने भन्दै ‘कांग्रेसलाई रूखमा भोट हाल्न पाउनुपर्ने’ भन्दै प्रतिवेदन पेस गरेका थिए । महामन्त्री थापाले ४६ पृष्ठको प्रतिवेदन तयार गरेका छन्, जसमा तीनै तहको सरकारमा पार्टी नेतृत्वदायी भूमिकामा भएपनि पार्टी सदस्यहरुले कांग्रेस सरकारमा भएको महसुस गर्न नसकेको उल्लेख छ ।
सरकारका नीति, प्राथमिकता र कार्यक्रमसँग पार्टी जोडिएको अनुभूत गर्न नसकेको विषय महामन्त्री थापाले प्रतिवेदनमा लेखेका छन् । ‘यस्तो अवस्थामा जताततै पार्टीभित्र एकखालको अलमल छ– हामीले सरकारको प्रतिरक्षा गर्ने कि प्रश्न ?’ उनले प्रतिवेदनमा भनेका छन् ।
यस्तै महामन्त्री विश्वप्रकाश शर्माले ‘एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटक भन्दा बढी सांसद बन्न नपाउने भन्ने प्रावधान पार्टी विधानमै संहिताकृत गर्नुपर्ने’ प्रस्ताव सहितको प्रतिवेदन केन्द्रीय समिति बैठकमा राखेका थिए ।
प्रतिवेदनमा गठबन्धन गर्ने या नगर्ने अथवा भएको गठबन्धनलाई निरन्तरता दिने या गठबन्धन छोड्ने जस्ता विषय व्यक्तिगत स्तरमा बन्ने मनोगत धारणाको भड्कावमा हुन नहुने बताएका छन् । महामन्त्री शर्माले अहिलेको गठबन्धन फरक मतको चुनौतीपूर्ण सहयात्रा भएको उल्लेख गरेका छन् ।
