६ भदौ, काठमाडौं ।
अख्तियार दुरुपयोग अनुसन्धान आयोग नक्कली शैक्षिक प्रमाणपत्रको सहायतामा अधिकृत बनेका दुई जनाविरुद्ध मुद्दा दायर गरेको छ ।
कपिलवस्तुको यशोधरा गाउँपालिकामा सिअनमी (अधिकृत छैटाैं) कार्यरत सरस्वती ओली क्षेत्री र स्याङ्जाको जगन्नदेवी स्वास्थ्य चौकी, गल्याङ नगरपालिकामा सिअहेव अधिकृत छैटाैं पदमा कार्यरत हिमा डुम्रे न्यौपानेविरुद्ध भ्रष्टाचार मुद्दा दायर भएको हो ।
उनीहरू दुवैविरुद्ध नक्कली शैक्षिक प्रमाणपत्रको आरोप लागेको छ ।
अख्तियारका प्रवक्ता नरहरि घिमिरेका अनुसार ओली क्षेत्री सो गाउँपालिकामा मातृ शिशु कार्यकर्ता पदबाट नियुक्ति लिएकी थिइन् ।
पछि, सिअनमी पदमा स्तरवृद्धि भएकी क्षेत्रीको प्राविधिक एसएलसी परीक्षा राष्ट्रिय स्वास्थ्य तालिम केन्द्र, पोखराबाट उत्तीर्ण गर्दा, रजिष्टर्ड अनमी नेपाल नर्सिङ काउन्सिलको दर्ता प्रमाण–पत्र लिँदा, नेपाल स्वास्थ्य सेवाको सहायक पाँचौं तहमा स्तर वृद्धि हुँदा र नेपाल स्वास्थ्य सेवाको अधिकृत छैटाैं तहमा स्तर वृद्धि भई सिअनमी निरीक्षक पद पाउन माध्यमिक शिक्षा परिषद्, उत्तर प्रदेशबाट हाईस्कूल परीक्षा पास गरेको भनी शैक्षिक योग्यताका नक्कली प्रमाण–पत्र पेस गरी लाभ एवम् सुविधा लिएको आयोगले जनाएको छ ।
आयोगका अनुसार न्यौपानेले माध्यामिक शिक्षा परिषद्, उत्तर प्रदेश, भारतबाट हाइस्कुल तहको झुट्टा शैक्षिक प्रमाण–पत्र पेश गरी श्री करापु उपस्वास्थ्य चौकी, लमजुङमा ग्रामीण स्वास्थ्य कार्यकर्ता दोस्रो तह, तृतीय (प्राविधिक) श्रेणीमा स्थायी नियुक्ति लिई सो पदको लाभ लिई भ्रष्टाचार निवारण ऐन, २०५९ बमोजिमको कसुर भएको छ ।
आयोगका अनुसार उनीहरू दुवै जनाविरुद्ध सजाय हुन मागदाबी लिई बिहीबार विशेष अदालत, काठमाडौँमा आरोपपत्र दायर भएको छ ।