७ भदौ, विराटनगर ।
राष्ट्रिय स्वतन्त्र पार्टी (रास्वपा) का निलम्बित महामन्त्री डा. मुकुल ढकालले पार्टीलाई अन्तिमपटक स्पष्टीकरण पेस गरेका छन् । शुक्रबार सामाजिक सञ्जालमार्फत् स्पष्टीकरण पेस गर्दै ढकालले रविलाई कडा चुनौतीसमेत दिएका छन् ।
उनले सभापति रवि लामिछानेलाई ठग, भ्रष्ट्राचारी र राहदानी दुरुपयोग गर्ने अपराधीका रूपमा प्रमाणित गर्न सक्ने भन्दै कडा चुनौती दिएका हुन् ।
‘तपाईं ठग, भ्रष्ट्राचारी र राहदानी दुरूपयोग गर्ने अपराधी हो भनेर प्रमाणित गर्न सक्छु । कारबाहीको दुस्साहस गर्दै हुनुहुन्छ, सक्नुहुन्छ भने मलाई गलत सावित गर्नुहोस्,’ मुकुलको चुनौती छ ।
साथै, उनले राष्ट्रिय ठगको चर्चा राष्ट्रियस्तरमा नै हुने पनि बताएका छन् । ‘तपाईंको कुकर्मको पर्दाफास गर्नु पार्टीविरूद्ध लाग्नु होइन, यो पार्टी हितमा हो । राष्ट्रिय ठगको चर्चा राष्ट्रियस्तरमा हुन्छ, पार्टीभित्र मात्र सीमित हुँदैन । तपाईं जस्तो ठग, भ्रष्ट र अपराधीको कब्जाबाट पार्टीलाई मुक्त गराएरै छाड्छु,’ उनले भनेका छन् ।
पार्टीविरुद्ध लागेको भन्दै कारबाहीमा परेका महामन्त्री ढकाललाई रास्वपाले पटक पटक प्रश्न सोधेको थियो । पछिल्लो पटक बसेको पार्टी केन्द्रीय समिति बैठकले ढकाललाई अन्तिम पटक स्पष्टीकरण सोधेको थियो ।
गत साउन ३० गते सचिवालयले सोधेको स्पष्टीकरणको जवाफ ढकालले दिइसकेका छन् । पार्टी सञ्चालन गर्न अक्षम, अनुशासनहीन, अराजनीतिक, अभद्र, अराजक व्यवहार गरी अनुशासन उल्लंघन गरेकोलगायतका आरोप लगाउँदै ढकाललाई महामन्त्री र प्रवक्ताको जिम्मेवारीबाट हटाइएको थियो ।
गत असार १९ बसेको केन्द्रीय समितिले उनलाई एक साताका लागि दुवै जिम्मेवारीबाट निलम्बन गरेको थियो ।
