७ भदौ, एजेन्सी ।
भारतको उत्तराखन्ड राज्यको केदारनाथनजिकै पहिरोले पुरिँदा चार जना नेपाली मजदुरको मृत्यु भएको छ । मृत्यु हुनेहरूमा तुलबहादुर, पूर्ण नेपाली, किशन परियार र चिकु बोहरा रहेको जनाइएको छ ।
बिहीबार राति परेको अविरल वर्षाका कारण केदारनाथनजिक रहेको वर्षाको पानी जम्मा गर्ने ताल (खाट गडेरे) नजिकै उनीहरूलाई पहिरोले पुरेको हो ।
बिहीबार राति करिब १ः२० बजे भारी वर्षाका कारण फाटा हेलिप्याडनजिकै पर्ने खाट गडेरे नजिक पहिरो गएको जिल्ला विपद् व्यवस्थापन अधिकृत नन्दनसिंह राजवारले जानकारी दिए ।
सूचना पाएलगत्तै उद्धार कार्यका लागि घटनास्थल पुगेको उद्धार टोलीले खनेर चार वटै शवलाई भग्नावशेषबाट निकालेको थियो ।
