७ भदौ, काठमाडौं ।
तनहुँको आँबुखैरेनी गाउँपालिकास्थित ऐना पहराबाट मर्स्याङ्दी नदीमा यात्रुवाहक बस खसेको छ । शुक्रबार बिहान साढे ११ बजे आबुखैरेनी गाउँपालिका-२ ऐनापहरास्थित सडकबाट बस मर्स्याङ्दी नदीमा खसेको हो ।
युपी ५३ एफटी ७६२३ नम्बरको बस पोखराबाट काठमाडौं आउँदै गरेको खुलेको छ । बसमा अन्दाजी ४० जना रहेको अनुमान लगाइएकाे छ ।
भारतीय पर्यटक बोकेको बस मर्स्याङ्दी नदीमा खस्दा ठुलै हताहती भएको प्रहरीले अनुमान गरेको छ । जिल्ला प्रहरी कार्यालय तनहुँका एसपी वीरेन्द्रबहादुर शाहीका अनुसार घटनास्थलमा आँबुखैरेनीको प्रहरी टोली पुगेको छ ।
डोरी लगाएर उद्धार गर्न थालिएको छ । उक्त बस दुर्घटनामा ठुलै हताहती भएको प्रहरीको अनुमान छ । अप्ठेरो भीर भएका कारण उद्धारमा कठिनाइ भएको प्रहरीले जनाएको छ ।
अप्ठेरो भीर भएका कारणले घाइते र मृतकको उद्धारमा डोरीको सहायताले नदी किनारमा पुग्ने प्रयास भइरहेको प्रहरीले जनाएको छ ।
