७ भदौ, विराटनगर ।
जर्मन मिडफिल्डर इल्के गुन्डोगन स्पेनिस क्लब बार्सिलोनाबाट फ्रि-ट्रान्सफरमा इंग्लिस क्लब म्यानचेस्टर सिटीमा फर्किएका छन् ।शुक्रबार सिटीले ३३ वर्षीय गुन्डोगनको फिर्ति प्रक्रिया पूरा गर्दै क्लबमा स्वागत गरेको छ ।
एक सिजन स्पेनिस क्लब बार्सिलोनाका लागि खेलेका गुन्डोगन पुनः सिटीमा फर्किएका हुन् । उनी सन् २०२३ जुलाईमा २० मिलियन युरोमा स्पेन पुगेका थिए । बार्सिलोनाबाट ५१ खेल खेल्दा पाँच गोल गरेका गुन्डोगान फेरि सिटीमा फर्किएका हुन् ।
सिटी फर्किएपछि उनले संसारकै सर्वोत्कृष्ट क्लबमा फर्किएको भन्दै प्रतिक्रिया दिएका छन् । ‘म धेरै नै खुसी छु, सहकर्मी र स्टाफहरूलाई फेरि देख्न पाउँदा खुसी लागेको छ । म फेरि एकपटक संसारकै सर्वोत्कृष्ट क्लबमा फर्किएको छु ।’
पुनः सिटी फर्किने चाहना प्रकट गरेपछि प्रशिक्षक पेप ग्वार्डिवालाले उनलाई भित्र्याएका हुन् । बार्सिलोना पुग्नुअघि उनले ३०४ खेल खेलेर ६० गोल गरे । सन् २०१६ देखि २०२३ सम्म सिटीबाट खेल्दा उनले पाँच वटा प्रिमियर लिग उपाधि र एउटा च्याम्पियन्स लिगको उपाधि जितेका छन् ।त्यसअघि भने उनले जर्मन क्लब बोरुसिया डर्टमुन्डलगायत टोलीबाट व्यवसायिक फुटबल खेलिसकेका छन् । जर्मनीको राष्ट्रिय फुटबल टिमका कप्तानसमेत रहेका गुन्डोगानले गत सोमबारमात्रै अन्तर्राष्ट्रिय फुटबलबाट सन्न्यासको घोषणा गरेका थिए ।
सन् २०११ मा राष्ट्रिय टोलीमा डेब्यु गरेका उनले ८२ अन्तर्राष्ट्रिय खेल खेलेका थिए । उनले जर्मनीका लागि १९ गोल गरेका छन् । उनले युरो २०२४ मा जर्मनीको कप्तानको भूमिका निर्वाह गरेका थिए ।
