९ भदौ , एजेन्सी ।
उत्तर कोरियाली कठोर तानाशाही प्रबृत्तिको शासनका बारे विश्व जानकार छ । कोरियाली नेता किम जोङ उनको कठोर तानाशाही स्वभावका कारण उत्तर कोरियाका हरकोही उनीसँग सशकिंत हुन्छन् । ४० वर्षीय किम जोङ नेतृत्वको मन्त्रिपरिषद् पनि उत्तिकै कडा स्वभावको छ । यसको पुष्ट्याँइ, एउटा घटनाबाट गर्न सकिन्छ ।
फ्रान्सको राजधानी पेरिसमा गत जुलाई २६ देखि अगस्ट ११ मा सम्पन्न भएको पेरिस ओलम्पिकमा सहभागी भएका दुई उत्तर कोरियाली खेलाडीले सेल्फी खिच्दैमा कारबाहीमा पर्नुपरेको छ । दक्षिण कोरियाली टेबलटेनिस खेलाडीसँग सेल्फी फोटो खिचाउने दुई उत्तर कोरियाली खेलाडीले स्वदेश फर्केपछि नैतिकताको जाँचको सामना गर्नु परेको हो ।
जबकि, एकै विधामा स्वर्ण, कास्य र रजत पदक जितेका उनीहरूले एकसाथ उभिनैपर्ने हुन्छ । टेबल टेनिसको मिश्रित प्रतियोगितामा रजत पदक जितेका खेलाडी रि जोङ सिक र किम कुम योङले पदक समारोहपछि चीन र दक्षिण कोरियाका खेलाडीसँग सेल्फी खिचेका थिए ।उनीहरूले चीनका गोल्ड मेडलिस्ट वाङ चुक्विन र सन यिङ्सा अनि दक्षिण कोरियाका कास्यपदक विजेता लिम जुङहुन शिन युबिनसँग टेनिस पोडियममा सेल्फी खिँचाएका थिए ।
तर, स्वदेश फर्किएलगत्तै उत्तर कोरियाको खेलकुद मन्त्रालयले विभिन्न तीन चरणमा उनीहरूमाथि नैतिकताको जाँच गरेको थियो । भौतिक संस्कृति तथा खेलकुद मन्त्री किम आइआइ–गुकको निर्देशनमा उनीहरू कारबाहीको दायरमा तानिएका हुन् । तथापि, उत्तर कोरियाको तर्फबाट उनीहरूलाई पेरिस ओलम्पिकमा छिमेकी देश दक्षिण कोरियाका खेलाडीसँग अन्तरक्रिया नगर्न निर्देशन दिइएको थियो ।
तर, पेरिस ओलम्पिकको प्रायोजकमध्ये दक्षिण कोरियाली इलेक्ट्रोनिक कम्पनी सामसुङ पनि एक थियो । सोही कारण पनि दक्षिण कोरियाली खेलाडीहरूकै आग्रहमा उत्तर कोरियाका खेलाडीहरू आफ्नो देशको नीतिविपरीत गएर फोटो खिच्न बाध्य भएका थिए । दक्षिण कोरियाली मिडियाका अनुसार फोटो खिच्ने क्रममा उत्तर कोरियाली खेलाडीको मुस्कुराउने व्यवहारले त्यहाँका अधिकारीहरूलाई विशेष समस्यामा पारेको थियो ।
दक्षिण कोरियाली समाचारपत्र जुङएङ एल्बोको रिपोर्टअनुसार गैर–कम्युनिस्ट देशहरूबाट फर्केपछि उत्तर कोरियालीहरूले नैतिक जाँचको सामना गर्नु सामान्य कुरा हो । खासगरी यी दुई राष्ट्रहरूबीच परराष्ट्र सम्बन्ध सुमधुर छैन । विगतमा अन्तर्राष्ट्रिय खेलकुद प्रतियोगिताहरूले दुई राष्ट्रबीचको कूटनीतिको अवस्था झल्काउने गरेको छ ।
सन् २०१८ मा यी दुई देशहरूबीच सुमधुर सम्बन्ध हुँदाताका प्योङचाङ ओलम्पिकको उद्घाटन समारोहमा दुवै देशहरू सँगै मार्च गर्दै र महिला आइस हक्की प्रतियोगितामा एकताबद्ध टोलीलाई फिल्डिङ गरेको देखाइएको थियो । तर, उत्तर कोरियाको लामो समयसम्म क्षेप्यास्त्र परीक्षण र सोलप्रतिको शत्रुतापछि उनीहरूको सम्बन्ध चिसिएको बताइन्छ ।
कुटनीतिक सम्बन्धकै कारण उत्तर कोरियाको खेलकुद मन्त्रालयले उनीहरूलाई कारबाही गर्न चाहेको आँकलन गर्न सकिन्छ । उत्तर कोरियाले पेरिस ओलम्पिकमा दुई रजत र चार कास्य गरी ६ पदक जितेको थियो । उत्तर कोरिया पदक तालिकाको ६८औं स्थानमा छ भने दक्षिण कोरिया १३ गोल्ड, नौ रजत र १० कास्य गरेर ३२ पदकसहित पदक तालिकाको आठौं स्थानमा छ ।
