१० भदौ, विराटनगर ।
ब्राजिलियन लिजेन्ड खेलाडी रोनाल्डिन्हो गाउचो मन नपराउने फुटबल समर्थक कमै होलान् ! मैदानमा अट्याकिङ मिडफिल्डरका भूमिका निर्वाह गर्न रुचाउने रोनाल्डिन्हो आफ्नो खेल कौशलबाहेक राम्रो स्वभाव र सामान्य जीवनबाट परिचित थिए ।
विश्वकप विजेतासमेत रहेका रोनाल्डिन्हो सन् २०१८ मा क्लब फुटबलबाट अलग भए । त्यसअघि सन् २०१३ मा नै उनले अन्तर्राष्ट्रिय फुटबलबाट सन्न्यास लिइसकेका थिए । ब्राजिलबाट सन् २००२ मा विश्वकप जितेका रोनाल्डिन्होले डेब्यु गरेकै वर्ष सन् १९९९ मा कोपा अमेरिकाको उपाधि जिते ।
रोनाल्डिन्होले ब्राजिलका लागि धेरै खेल खेल्न पाएनन् । अन्तिम खेलका रूपमा सन् २०१३ मा उनले चिलीविरुद्ध कप्तानको भूमिका निर्वाह गर्दै ९३ मिनेट खेलेका थिए । त्यसपछि उनी ब्राजिलको जर्सीमा देखिएनन् । १४ वर्ष ब्राजिलका लागि खेल्दा उनले ९७ खेलमात्र खेलेका छन्, जसमाले उनले ३३ गोल गरेका छन् । तर, राष्ट्रका लागि भन्दा बढी व्यवसायिक फुटबलमा धेरै समय बिताए ।
बार्सिलोना, पिएसजी, एसी मिलानजस्ता युरोपका उत्कृष्ट क्लबहरूबाट व्यवसायिक फुटबल खेलेका उनले एक पटक च्याम्पियन्स लिग जितेका छन् भने एक पटक बालोन डी‘ओरबाट पुरस्कृत बनेका छन् । विभिन्न आठवटा क्लबहरूबाट ५४९ खेल खेल्दा उनले १९८ गोल गरेका छन् ।
क्लब फुटबलमा रोनाल्डिन्होले स्पेनिस क्लब बार्सिलोनाका लागि २०७ खेल खेल्दा ९४ गोल गरेका छन् । यसैले पनि भन्न सकिन्छ, रोनाल्डोको प्रिय क्लब बार्सिलोना हो । किनकि, आफ्नो छोरा जाओ मेन्डेसलाई समेत उनले बार्सिलोनाको एकेडेमीमा राखेर फुटबल सिकाए । मेन्डेस अहिले मैदानमा बुबाजस्तै अट्याकिङ मिडफिल्डरको भूमिकामा छन् । उनै मेन्डेस अहिले च्याम्पियनसिप क्लब बर्नलीमा उडान भर्ने तरखरमा छन् ।१९ वर्षीय फरवार्ड मेन्डेस बार्सिलोनाको यु–१९ छोडेर इंग्लिस च्याम्पियनसिप क्लब बर्नली यु–२१ मा अनुबन्ध भएका छन् । गत सातामात्र इंग्लिस क्लब आइपुगेका उनले चाँडै बर्नलीको सिनियर टोलीबाट खेल्ने विश्वास गरिएको छ ।
अघिल्लो वर्षको मार्चमा ब्राजिलको क्रुजेरियोबाट बार्सिलोनाको यु–१८ अनुबन्ध भएका मेन्डेसले आफ्नो बुबाकै कारण चार महिनापछि नै बढुवा हुन पाएका थिए । तर, उनको स्पेन बसाइ छोटो रह्यो । अहिले बर्नलीसँग दुई वर्षे सम्झौता गरेर उनी इंग्ल्यान्ड हानिइसकेका छन् ।
स्कट पार्कर नेतृत्वको बर्नली प्रिमियर लिगबाट घटुवा भएर च्याम्पियनसिप खेलिरहेको छ । जसअन्तर्गत अहिले पाँचौं स्थानमा रहेको बर्नली यसपालि बढुवा भएर पुनः युरोपको सर्वाधिक ठुलो मानिने प्रिमियर लिगमा ‘कमब्याक’ गर्ने योजनामा छ । अब, बर्नलीले काराबाओ कपको दोस्रो चरणमा बुधबार वुल्भ्सको सामना गर्ने छ ।
