११ भदौ , एजेन्सी ।
क्यानडाले अस्थायी विदेशी कामदारको संख्या घटाउने भएको छ । आफ्नो सरकारले देशमा कम पारिश्रमिकमा काम गर्ने, अस्थायी विदेशी कामदारहरूको संख्या घटाउन लागेको त्यहाँका प्रधानमन्त्री जस्टिन ट्रुडोले सोमबार भनेका हुन् ।
अब क्यानाडाली व्यवसायहरूले घरेलु कामदार र युवाहरूमा लगानी गर्ने समय आएको पनि उनले बताएका छन् । ट्रुडोले सामाजिक सञ्जालमा पोस्टमार्फत यो जानकारी दिएका हुन् ।
अहिले श्रम बजारमा परिवर्तन आएको उनको भनाइ छ । ‘हामी क्यानाडामा आउने कम ज्यालामा काम गर्ने र अस्थायी विदेशी कामदारहरूको संख्या घटाउँदैछौं । श्रम बजारमा परिवर्तन भएको छ । अब हाम्रो व्यवसायहरूका लागि क्यानाडाली कामदार र युवाहरूमा लगानी गर्ने समय आएको छ,’ ट्रुडोले माइक्रो ब्लगिङ वेबसाइटमा एउटा पोस्ट गर्दै भनेका छन् ।
क्यानडामा जनसंख्या बढिरहेकै समयमा यो कदम चालिएको हो । जनसंख्या बढेसँगै त्यहाँ आवास र स्वास्थ्य सेवा जस्ता सार्वजनिक सेवामा दबाब परेको अर्थविद्हरूले बताइरहेका छन् ।
क्याडनाको जनसंख्यामा भएको अधिकांश वृद्धि गत वर्ष देखिएको हो । गएको दुई महिनामा क्यानडाको बेरोगारी दर बढेर ६ दशमलव ४ प्रतिशतमा उक्लिएको छ ।
देशभरमा झन्डै १४ लाख मानिस बेरोजगार रहेको अनुमान गरिएको छ ।
