१२ भदौ, विराटनगर ।
काठमाडौंमा जारी दक्षिण एसियाली फुटबल महासंघ (साफ) यु–२० च्याम्पियनसिप फुटबलको फाइनल खेल बुधबार (आज) हुँदै छ । उपाधिका लागि घरेलु टोली नेपालले साविकको उपविजेता बंगलादेशसँग प्रतिस्पर्धा गर्दैछ ।
नेपाल र बंगलादेशबीचको खेल सातदोबाटोस्थित एन्फा मैदानमा दिउँसो २ः३० बजेदेखि सुरु हुने छ । फाइनल खेल निकै प्रतिस्पर्धात्मक र रोमाञ्चक हुने अपेक्षा गरिएको छ ।
किनकि, तीन पटकको विजेता भारतलाई हराएको बंगलादेश यस खेलमा उच्च मनोबलका साथ मैदान उत्रिने छ भने समूह चरणमै बंगलादेशलाई हराएका कारण नेपाल पुनः फाइनलमा स्तब्ध बनाउने दाउमा हुने छ ।
त्यसबाहेक नेपाल लामो समयदेखिको उपाधि खडेरी तोड्ने योजनामा हुने छ ।तथापि, उपाधि भिडन्त भएका कारण पनि गोल हुनबाट जोगिएर गोल गर्नतिर लाग्ने योजनाका साथ दुवै टोली लागिपर्ने छन् ।सेमिफाइनलमा दुवै टोलीले टाइब्रेकरमा बाजी मारेर फाइनल यात्रा तय गरेका हुन् ।
सेमिफाइनलमा नेपालले भुटानलाई टाइब्रेकरमा ४–१ गोल र बंगलादेशले साबिक विजेता भारतलाई टाइब्रेकरमै ४–३ गोलले हराएको थियो । पाकिस्तानबाहेक ६ टोलीको सहभागिता रहेको प्रतियोगितामा नेपालले समूह ‘ए’ बाट प्रतिस्पर्धा गरेको थियो ।
कुशल देउवा कप्तानीमा रहेको नेपालले समूहको पहिलो खेलमा श्रीलंकालाई १–० गोलले हराएको थियो भने दोस्रो खेलमा नेपालले बंगलादेशलाई २–१ गोलले हराएर समूह विजेताको रूपमा सेमिफाइनलमा स्थान बनाएको थियो ।
समूह ‘बी’ बाट भारत, माल्दिभ्स र भुटानले प्रतिस्पर्धा गरेका थिए ।
फाइनलअघि मंगलबार आयोजित प्रिम्याच कन्फ्रेन्समा दुवै टोलीका प्रशिक्षक र कप्तानले फाइनलका लागि आफूहरू तयार भएको बताएका थिए ।
नेपालका मुख्य प्रशिक्षक उर्जन श्रेष्ठले फाइनल पुग्दे दुवै टोली राम्रो भएकोले खेल प्रतिस्पर्धात्मक हुने बताए । तर, दशरथ रंगशाला खेल्नयोग्य नभएकोले गर्दा एन्फा कम्प्लेक्समा घरेलु समर्थकको अभाव हुने देखिएको छ ।
यसअघि दशरथ रंगशालामै फाइनल खेल हुने तय भएको थियो । नेपालको एकमात्र अन्तर्राष्ट्रियस्तरको दशरथ मैदान हिलाम्मे भएकाले खेल्न निमल्ने हुँदा नेपाली टोलीलाई दर्शक अभाव खड्किने छ ।
यता, बंगलादेशका प्रशिक्षक मरुफुल हकले फाइनल यात्रासम्म आइपुग्दा उतारचढाव बेहोरेको बताएका छन् । तर, भारतलाई हराउन सफल भएका खेलाडीहरू उच्च मनोबलका साथ मैदान उत्रिने भएका कारण उपाधि यात्रा सहज देखेको उनको भनाइ छ ।
नेपाल सन् २०१७ पछि साफको उमेरसमूहको प्रतियोगिताको उपाधिनजिक पुगेको हो । यसअघि सन् २०१५ र २०१७ गरी दुईपटक फाइनल पुगेको नेपालले ती दुवै प्रतियोगिताको उपाधि जितेको थियो । तर, त्यसयताका तीन संस्करणमा भने नेपाल च्याम्पियन बन्न सकेको छैन ।
नेपालले ९ वर्षअघि सन् २०१५ मा उमेरसमूहको साफको पहिलो संस्करण आयोजना हुँदा भारतलाई पराजित गर्दै उपाधि जितेको थियो ।उक्त प्रतियोगिता पनि एन्फा कम्प्लेक्समै भएको थियो । र, आज एन्फा कम्प्लेक्समै बंगलादेशमाथि जित दर्ता गरेर नेपालले ट्रफी उचाल्ने लक्ष्य लिएको छ ।
सन् २०१७ मा भुटानको थिम्पुमा सिंगल राउन्ड रोबिनमा भएको साफ यु–१८ नेपालले बंगलादेशलाई गोल संख्यामा पछि पार्दै दोस्रोपटक उपाधि जितेको थियो ।
नेपाल चार पटक साफअन्तर्गतका उमेर समूहका प्रतियोगिता आयोजना गर्दा एकपटक सन् २०१५ मा उपाधि घरमै राख्न सफल भएको छ । सन् २०१९ र २०२३ मा भने नेपालमा प्रतियोगिता हुने तर च्याम्पियनचाहिँ भारत हुने सिलसिला बढेको थियो । तर, भारतलाई जित्दै नेपालसँगको भेट पक्का गरेको बंगलादेशलाई हराउँदै उपाधि बाहिर लैजान नदिने योजनामा घरेलु टिम छ ।
